Read Библија, Константинов Псалми 62 Bible Online

Псалми 62 - Библија, Константинов bible

Псалми 62

¹За началник на пејачи, по Едутуна. Давидов псалм. Душо моја, мирот е само во Бога, спасението е само во Него.

²Само Тој е моја заштита и спасение, Тврдина моја: нема да се поколебам.

³До кога ќе се нафрлате врз бедниот, за да го сотрете сите заедно, како разурнат ѕид или навалена ограда?

⁴Се заверија да ме фрлат од мојата висина, уживаат во лага; благословуваат со устата, а колнат со срцето.

⁵Душо моја, мирот е само во Бога, мојата надеж е само на Него.

⁶Само Тој е моја заштита и спасение, Тврдина моја: нема да се поколебам.

⁷Во Бога е моето спасение и слава; Бог ми е силна карпа и прибежиште.

⁸Надевај се на Него, народе, во секое време, излевајте ги срцата пред Него: Бог е наше засолниште!

⁹Синовите на луѓето се суетни, лага се човечките синови: Сите да застанат на мерилка, ќе бидат полесни од суетата.

¹⁰Не се надевајте на насилие, ниту се фалите суетно со ограбеното; ако ви се зголеми богатството, вашето срце нека не се прилепи кон него.

¹¹Бог рече едно, а јас чув две: „Силата е во Бога!”

¹²Господи, во Тебе е добрината! Ти му враќаш секому според делата.