Read Библија, Константинов Псалми 68 Bible Online

Псалми 68 - Библија, Константинов bible

Псалми 68

¹За началник на пејачи. Давидов псалм. Песна. Нека се крене Бог! Нека се разбегаат Неговите непријатели, нека избегаат пред Него сите Негови мразители!

²Како што исчезнува димот, нека ги снема и нив! Како што се топи восокот врз оган, така нека ги снема грешниците пред Божјото лице!

³Нека се радуваат праведните, нека Му пеат на Бога, нека воскликнуваат од радост.

⁴Пејте на Бога, славете го Неговото име! Порамнете го патот на Оној, Кој оди низ пустината, чие име е Господ - и радувајте се пред Него!

⁵Татко на сирачињата, бранител на вдовиците, Бог е во Своето свето Живеалиште.

⁶Бог ќе ги настани осамените во семејства, на затворениците ќе им даде среќна слобода: само бунтовниците останаа во безводната пустина.

⁷Боже, кога чекореше пред Својот народ, додека поминуваше низ пустината,

⁸земјата се тресеше, небото росеше пред Бога, Синај трепереше пред Бога, Израелевиот Бог.

⁹Боже, Ти испрати благословен дожд на Своето наследство, го зајакна кога беше уморно.

¹⁰Твоето стадо се насели во него, со добрина Боже, Ти го подготви за сиромашниот.

¹¹Господ даде слово: големо е мноштвото на радосните известители:

¹²Царевите на војските бегаат и бегаат, домаќинките го разделуваат запленетото.

¹³Додека вие се одморувавте меѓу стадата, крилата на гулабицата заблистаа со сребро, а нејзиното перје со жолтикаво злато:

¹⁴таму Сèмоќниот ги разбиваше царевите, а таа заблеска како снег на Селмон.

¹⁵Божја планина е Васанската планина; високата Гора, е Васанска Гора.

¹⁶Зошто вие, врвлести планини, гледате со завист на гората, каде Бог благоволи да живее? Господ ќе престојува на неа секогаш!

¹⁷Божјите воени коли се безбројни, илјадници илјади: Господ доаѓа од Синај во Своето Светилиште!

¹⁸Издигајќи се на височина, водејќи ги заробениците, Ти доби дарови меѓу луѓето, а и меѓу бунтовниците - за да се настаниш таму Господе Боже!

¹⁹Благословен да е Бог од ден на ден, Бог нè носи, нашиот Спасител.

²⁰Нашиот Бог е Бог Кој спасува, Господ избавува од смрт.

²¹Навистина, Бог ќе ги скрши главите на Своите непријатели, влакнестото теме на оној, што оди во гревови.

²²Господ рече: „Ќе ги доведам од Васан, ќе ги доведам од длабочината на морето,

²³за да ја капеш ногата во крв, за да имаат јазиците на твоите кучиња дел од непријателот.

²⁴Боже, го гледаат влегувањето, влегувањето на мојот Бог и Цар во Светилиштето:

²⁵Напред пеачи, по нив свирачи, во средина - девици со даириња.

²⁶„Славете Го Бога на свечени собранија, славете Го Бога, Израелеви синови!”

²⁷Најмладиот, Венијамин, ги предводува, кој оди пред нив, таму се Јудините кнезови со своите чети, Завулоновите кнезови и Нефталимовите кнезови.

²⁸Боже, покажи ја Својата сила, силата, Боже, со која се бориш за нас

²⁹од Својот Храм во Ерусалим! Нека Ти носат царевите дарови!

³⁰Скроти го ѕверот во трската, стадо бикови со телиња на народите! Нека се опростат пред Тебе со сребрените жезли: распрсни ги народите, кои ја сакаат војната!

³¹Нека дојдат големците од Египет, Етиопија нека Му пружи рака на Бога!

³²Сите царства на светот пејте Му на Бога, славете Го Господа,

³³Кој се вози по небото, по исконското небо! Чуј, грми со гласот, со Својот силен глас:

³⁴„Признајте ја Божјата сила!” Неговото величество над Израел, Неговата сила во облаците!

³⁵Страшен е Бог од Своето Светилиште. Израелевиот Бог му дава моќ и сила на Својот народ. Благословен да е Бог!