Read Библија, Константинов Псалми 69 Bible Online

Псалми 69 - Библија, Константинов bible

Псалми 69

¹За началник на пејачи. На Шошаним. Давидов псалм. Спаси ме, Боже, водите ми стигнаа до грлото!

²Потонав во длабока тиња и нема каде да ја ставам ногата; тонам во длабока вода, брановите ме покриваат.

³Изнемоштев од викање, грлото ми зарипна, очите ми се истоштија, чекајќи Го мојот Бог.

⁴Побројни се од влакната на мојата глава, оние што ме мразат за ништо. Потврди се од моите коски, оние што ми се противат неправедно: Зар можам да вратам она што не сум ограбил?

⁵Боже, Ти ја знаеш мојата безумност, не Ти се скриени моите гревови.

⁶Нека не се засрамат заради мене, оние што се надеваат на Тебе, Господи, Господи, над Воинствата! Нека не се засрамат заради мене, кои Те бараат Тебе, Боже Израелев!

⁷Зашто заради Тебе, претрпев навреда и срам ми го покри лицето.

⁸Туѓинец им станав на браќата и странец на децата на својата мајка.

⁹Зашто ме изеде ревноста за Твојот Дом и навредите на оние, што Те навредуваат Тебе, паднаа на мене.

¹⁰Душата ја измачував со пост, ми се сврте на срам.

¹¹Зедов вреќа за облека и им станав приказ.

¹²Кои седат пред вратата, зборуваат против мене, пијаниците ми пеат шеговити песни.

¹³Но Тебе Ти се молам, Господи, во време на милоста Боже; услиши ме според Твојата голема добрина, според верноста на Твоето спасение!

¹⁴Извлечи ме од калта, за да не потонам, избави ме од оние што ме мразат - од длабоките води.

¹⁵Не оставај да ме покријат брановите, не оставај да ме проголта длабочината, не оставај бездната да ја затвори устата над мене!

¹⁶Услиши ме, Господи, зашто е благо Твоето милосрдие, погледај на мене, според Твојата голема милост!

¹⁷Не го скривај лицето пред Твојот слуга; зашто сум притеснет, услиши ме брзо!

¹⁸Приближи и се на мојата душа и спаси ја; ослободи ме заради моите непријатели!

¹⁹Ти знаеш како ме навредуваат, засрамуваат и срамат, пред Твоите очи се сите што ме измачуваат.

²⁰Навредувањето ми го скрши срцето и се истоштив, чекав некој да се сожали над мене, ама немаше никој. И некој да ме утеши, ама не го најдов.

²¹Во јадењето ми замешаа жолчка, во мојата жед ме напоија со киселина.

²²Трпезата нека им биде примка, а жртвените гозби стапица!

²³Нека им се смрачат очите за да не гледаат, нека им ослабеат боковите засекогаш.

²⁴Излеј ја Својата лутина врз нив, нека ги зафати жарот на Твојот гнев!

²⁵Нека им запусти нивното живеалиште, нека не живее никој во нивниот шатор!

²⁶Зашто го гонеа оној, кого Ти го искара, болката му ја зголемуваат на оној, кого Ти го рани.

²⁷Врз нивното беззаконие додај уште вина, да не се оправдаат пред Тебе!

²⁸Нека бидат избришани од книгата на живите, нема да бидат вброени меѓу праведниците.

²⁹А јас сум беден и болен - нека ме штити Твојата помош, о Боже!

³⁰Ќе Го фалам Божјото име со песни, ќе Го величам со зафалници.

³¹Тоа ќе Му биде помило на Господа отколку жртвен бик, помило од јунец со копита и рогови.

³²Гледајте, бедни, и радувајте се, нека ви оживее срцето на сите, кои Го барате Бога.

³³Зашто Господ ги слуша сиромасите, Тој не ги презира Своите пленици.

³⁴Нека Го фалат небесата и земјата, морињата и сè што се движи во нив.

³⁵Зашто Бог ќе го избави Сион - Тој ќе ги изгради Јудините градови - тие ќе живеат таму, ќе имаат наследство.

³⁶Ќе го наследат и потомците на Неговите слуги, ќе престојуваат во него оние, кои Го љубат Божјото име.