Read Библија, Константинов Псалми 71 Bible Online

Псалми 71 - Библија, Константинов bible

Псалми 71

¹Господи, на Тебе се надевам, не оставај, никогаш да се засрамам!

²Избави ме во Својата правда и спаси ме; наведни го увото и спаси ме!

³Биди ми закрила на засолниште и цврста тврдина на спасението зашто Ти Си моја стена и тврдина.

⁴Боже мој, истргај ме од рацете на злотворот, од рацете на силникот и угнетувачот:

⁵зашто, Ти Си, Господи, моја надеж, Господи, надеж од мојата младост!

⁶На Тебе се потпирам од раѓањето; Ти Си ми заштитник од мајчиното крило: на Тебе пеам секогаш.

⁷За мнозина станав чудо, зашто Ти ми беше силна помош.

⁸Мојата уста беше полна со Твојата фала, Те славеше секој ден!

⁹Не ме отфрлај на старост: не ме оставај, кога ќе ми се намали силата.

¹⁰Зашто моите непријатели зборуваат за мене, и кои ме дебнат, се советуваат сложно:

¹¹„Бог го напушти; гонете го и фатете го, зашто нема кој да го спаси!”

¹²О Боже, не стој далеку од мене, Боже мој, поитај ми на помош!

¹³Нека се засрамат и пропаднат кои го бараат мојот живот; нека се покријат со укор и срам оние, што ми сакаат зло!

¹⁴А јас ќе се надевам секогаш, ќе Те фалам сè повеќе, и повеќе.

¹⁵Со устата ќе ја проповедам Твојата правда, постојано Твоето спасение, зашто не им го знам бројот.

¹⁶Ќе раскажувам за Господовата сила, Господи, ќе ја славам само Твојата праведност.

¹⁷Боже, Ти ми беше учител од мојата младост, и сè досега ги разгласувам Твоите чудеса.

¹⁸Ни во староста, кога ќе обелам во косата, Боже, не ме оставај; за да раскажувам за Твојата мишка на идното поколение и на сите идни поколенија, за Твојата сила.

¹⁹И за Твојата праведност, Боже, што стига до небото, со која направи големи дела. Боже, кој е како Тебе!

²⁰Многу и големи трпенија фрли врз мене: но Ти ќе ме оживиш пак и пак ќе ме кренеш од длабочината на земјата.

²¹Зголеми го моето достоинство и утеши ме пак!

²²А јас, со псалтир, ќе ја славам Твојата верност, о Боже, ќе Ти свирам со лира, Израелев Светец!

²³Моите усни ќе воскликнуваат пеејќи Ти, и мојата душа, што ја избави.

²⁴И мојот јазик секогаш ќе ја слави Твојата правда, зашто се засрамени и понижени оние, што сакаат несреќа за мене.