Read Библија, Константинов Псалми 72 Bible Online

Псалми 72 - Библија, Константинов bible

Псалми 72

¹За Соломон. (Давидов псалм). Боже, дај му го Твоето правосудство на царот и Твојата правда на царскиот син.

²За да му суди праведно на Твојот народ, на бедните според праведноста!

³Нека планините му донесат мир на народот, а брежињата правда.

⁴Ќе им суди право на угнетуваните, ќе им донесе спасение на децата на бедните, а насилниците ќе ги сотре.

⁵Нека се бојат од Тебе, додека трае сонцето, и месечината, низ сите поколенија.

⁶Ќе слезе како роса врз тревата, како дожд што ја напојува земјата!

⁷Во Негово време ќе цветаат правдата и големиот мир - сè додека постои месечината.

⁸И Тој ќе владее од море до море, и од Реката (Еуфрат) до границите на светот.

⁹Оние што живеат во пустината, ќе клекнат пред него, и противниците ќе го лижат правот.

¹⁰Царевите на Тарсис и на островите ќе Му донесуваат подароци, владетелите на Арабија и на Сева ќе Му донесуваат данок.

¹¹Сите владетели ќе Му се поклонуваат, сите народи ќе Му служат.

¹²Тој ќе го спаси бедниот што воздивнува, угнетуваниот, што нема помошник;

¹³ќе им се смилува на немоќниот и бедниот, и ќе му го спаси животот на страдалецот:

¹⁴Ќе ги ослободи од неправдата и насилствата, зашто нивната крв е скапоцена во неговите очи.

¹⁵Затоа нека живее! Нека Го даруваат со злато од Арабија, нека се молат за Него секогаш и нека Го благословуваат преку цел ден!

¹⁶Нека има изобилство на жито во земјата, класјето по врвовите нека шуми како кедровите Либански! И нека цветаат градските жители како трева на ливадата.

¹⁷Неговото име нека е благословено довека! Неговото име се зголемува. Додека сонцето трае, со Него ќе бидат благословувани сите племиња на земјата, сите народи ќе го наречуваат блажен!

¹⁸Благословен да е Господ, Израелевиот Бог, Кој единствен твори чудеса!

¹⁹И благословено да е Неговото славно име довека! Нека се исполни целата земја со Неговата слава! Така нека биде. Амин!

²⁰Со тоа завршуваат молитвите на Јесеевиот син Давид.