Read Библија, Константинов Псалми 74 Bible Online

Псалми 74 - Библија, Константинов bible

Псалми 74

¹Асафово учење. Боже зошто нè отфрли засекогаш, зошто врие Твојот гнев против овците на Твоето пасиште?

²Спомни си за собранието што го придоби одамна, племињата што ги искупи како Свое наследство, и Сионските Планини, каде што си Се населил.

³Зачекори кон вечните урнатини; непријателот разори сè во Светилиштето.

⁴Твоите противници викаа на средина на Твоето собрание, своите знаци ги поставија како знаци на победата.

⁵Беа како оние што мавтаат со секира по густи шуми.

⁶И сега со секира и чекан ги кршеа резбите.

⁷Го предадоа на оган Твоето Светилиште, го онечистија до земја Живеалиштето на Твоето име.

⁸Рекоа во своето срце: „Ги истребивме заедно; изгорете ги сите Божји светилишта на земјата!”

⁹Не ги гледавме своите знаци, нема веќе пророци, и никој меѓу нас не знае до кога...

¹⁰О Боже, уште до кога непријателот ќе се потсмева? Дали непријателот ќе го презира Твоето име довека?

¹¹Зошто ја повлекуваш раката и зошто ја криеш во крило Својата десница? Оттргни ја од своето крило, погуби ги!

¹²Но, Бог е мој Цар од древноста, Тој, Кој спасува среде земјата!

¹³Ти, со Својата сила, го расече морето, ги смачка главите на морските чудовишта, во водите.

¹⁴Ти му ги скрши главите на Левијатана! Го даде за храна на народите пустински.

¹⁵Ти овозможи да потечат извор и буица, Ти ги пресуши непресушливите реки.

¹⁶Денот е Твој и ноќта е Твоја, Ти ги зацврсти месечината и сонцето;

¹⁷Ти ги создаде сите граници на земјата, Ти ги создаде летото и зимата.

¹⁸Спомни си за ова: Господи, непријателите Ти се потсмеваа, и безумен народ го похули Твоето име.

¹⁹Не предавај му го на јастребот животот на грлицата Твоја, и не заборавај го никогаш животот на Твоите сиромаси!

²⁰Погледај на Својот Завет, зашто темните катчиња на земјата се полни со живеалишта на насилства.

²¹Не оставај угнетуваниот да замине засрамен: нека бедниот и немоќниот Го фалат Твоето име!

²²Стани, Боже, заземи се за Своето дело, спомни си за навредата што безумникот Ти ја нанесува секој ден.

²³Не заборавај го гласот на Своите непријатели: вревата на бунтовниците уште се крева кон Тебе!