Read Библија, Константинов Псалми 76 Bible Online

Псалми 76 - Библија, Константинов bible

Псалми 76

¹За началник на пејачи. На жичани свиралки. Асафов псалм. Песна. Бог е познат во Јудеја, Неговото име е величествено во Израел!

²Неговото живеалиште е во Салим, а престојувалиштето на Сион.

³Тој ги искрши таму: огнените стрели на лаковите, штитовите, мечевите, и оружјето бојно.

⁴Блескав си од светлина, повеличествен од древните планини.

⁵Ограбени се оние што имаа тврдо срце, и го сонуваат својот сон - им онемоштија рацете на сите храбри.

⁶Од Твојата закана, Боже Јаковов, се скаменија колите и коњите.

⁷Ти си страшен, и кој може да опстане пред жестокоста на Твојот гнев?

⁸Ја изрече пресудата од небото, земјата се стресе и занеме од страв;

⁹кога Бог стана да суди, да ги спаси кротките на земјата.

¹⁰Зашто ќе Те прославува и бесот на човекот и со остатокот на бесот Ти се завиткуваш.

¹¹Заветувајте се и исполнувајте ги заветите на Господа, вашиот Бог; сите, околу Него, нека му донесуваат дарови на Достојнопочитуваниот.

¹²Кој ја зауздува гордоста на кнезовите, Кој е страшен за царевите на земјата.