Read Библија, Константинов Псалми 81 Bible Online

Псалми 81 - Библија, Константинов bible

Псалми 81

¹За началник на пејачи. На гетска свиралка. Асафов псалм. Пејте Му радосно на Бога, на нашата сила, пејте Му радосно на Јакововиот Бог!

²Нека зазвучат жиците, нека се чуе тапанчето, свирете со милозвучен псалтир!

³Затрубете во рог при млада месечина, при нова месечина, на нашиот празник!

⁴Зашто тоа е Израелев закон, заповед на Јакововиот Бог.

⁵Таков закон му даде на Јосифа, кога излегуваше од Египетската Земја.

⁶Чув таинствено шепотење: „Го ослободив од терет неговото рамо, рацете му се слободни од кошницата.

⁷При тешкотија Ме повика, и Јас те избавив; Ти одговорив од громовниот облак; те искушав при Меривските Води.

⁸Слушај, Мој народе, и Јас ќе те опоменам: о, да Ме послушаш, Израеле!

⁹Да нема друг бог меѓу тебе, и не клањај се на друг бог!

¹⁰Јас Сум Господ, твој Бог, Кој те изведе од Египетската Земја: отвори ја твојата уста и ќе ја наполнам!

¹¹Но Мојот народ не го слушаше Мојот глас, Израел не Ме послуша.

¹²Затоа го оставив на неговото окоравено срце: нека оди како што му се сака!

¹³О, кога Мојот народ би Ме слушал, кога Израел би чекорел по Моите патишта,

¹⁴брзо би ги покорил неговите непријатели, Својата рака би ја свртел против неговите противници.

¹⁵Тие што го мразат сега, би му се додворувале, и нивната судбина би била запечатена засекогаш.

¹⁶А Својот народ би го хранел со најдобрата пченица, и би го сител со мед од пештерите.”