Read Библија, Константинов Псалми 83 Bible Online

Псалми 83 - Библија, Константинов bible

Псалми 83

¹Песна. Асафов псалм. Господи, не молчи! Боже, не премолчувај и не мирувај!

²Зашто еве: Твоите непријатели зовреа, а Твоите мразители ја креваат главата.

³Се заверуваат против Твојот народ и се советуваат против Твоите штитеници.

⁴Зборуваат: „Дојдете да ги истребиме, за да не бидат народ, нека не се спомнува повеќе името Израел!”

⁵Навистина, едногласно се советуваат и склучија сојуз против Тебе:

⁶Шаторите на Едом и Исмаилците, Моавците и Агарјанците,

⁷Гевал, Амон и Амалик, Филистимците со жителите на Тир.

⁸И Асирците се здружија со нив, им подадоа рака на Лотовите потомци.

⁹Направи им како на Мадијамците, како на Сисара и на Јавина при потокот Кисон:

¹⁰кои загинаа близу Ен-Дор и станаа гној за нивите.

¹¹Направи ги нивните кнезови како Орив и Зив, сите нивни водачи нека бидат како Зевеј и Салман,

¹²што викаа едногласно: „Да ги освоиме Божјите краишта!”

¹³Дај, О Боже, да бидат како завиорен прав, како плева што ветерот ја носи.

¹⁴Како што огнот ја голта гората, како што пламенот ги изгорува шумите,

¹⁵гони ги така со Својата бура, исплаши ги со Својот виор!

¹⁶Покри им го лицето со срам, за да го бараат Твоето име, Господи!

¹⁷Нека се засрамат и плашат засекогаш, нека се срамат и нека изгинат!

¹⁸Нека знаат: Ти си, Чие Име е - Господ! Единствен, Сèвишен на целата земја.