Read Библија, Константинов Псалми 86 Bible Online

Псалми 86 - Библија, Константинов bible

Псалми 86

¹Давидова молитва. Господи, приклони го Своето уво и услиши ме, зашто сум беден и немоќен.

²Чувај ја мојата душа, зашто сум Ти посветен на Тебе; спаси го Твојот слуга, што се надева на Тебе!

³Ти мој Боже, о Господи, смилувај ми се, зашто постојано викам кон Тебе.

⁴Развесели ја душата на Својот слуга, зашто кон Тебе, Господи, ја издигам својата душа.

⁵Зашто Ти си, Господи, добар и проштаваш со задоволство, полн си со љубов кон сите, кои Те повикуваат.

⁶Чуј ја, Господи, мојата молитва, и внимавај на гласот на мојот повик.

⁷Во ден на неволја Те призовувам Тебе, зашто ќе ме послушаш.

⁸Ти нема рамен меѓу боговите, Господи, нема дела какви што се Твоите.

⁹Сите народи, што ги создаде, ќе дојдат и ќе Ти се поклонуваат о Господи, и ќе го прославуваат Твоето име.

¹⁰Зашто Ти си величествен и правиш чудеса: Ти си Единствен Бог.

¹¹Научи ме на Својот пат, Господи, за да одам верен кон Тебе, обедини го моето срце, да се бои од Твоето име!

¹²Ќе Те фалам Господи, мој Боже, со сето свое срце, ќе го славам Твоето име довека.

¹³Зашто е изобилна Твојата љубов кон мене, ја истрга мојата душа од длабочините на Подземјето.

¹⁴О Боже, гордите се кренаа против мене, многу силници го дебнат мојот живот, и Те немаат Тебе пред очите.

¹⁵Но Ти си, Господи Боже, милостив и благ, спор на гнев, обилен во љубов и вистина.

¹⁶Погледај на мене и смилувај ми се; дај му ја Твојата сила на Твојот слуга и спаси го синот на Твојата слугинка!

¹⁷Дај ми милостиво знак на Твојата наклоност, за да видат моите мразители и да се засрамат, зашто Ти ми помогна, Господи, Ти ме утеши.