Read Библија, Константинов Псалми 88 Bible Online

Псалми 88 - Библија, Константинов bible

Псалми 88

¹Песна. Псалм. За Корееви синови. За началникот на пејачите на Махалат за понизност за пеење. Учење на Еман Езрахит. Господи, Боже на моето спасение, дење викам, а ноќе тажам пред Тебе.

²Нека стигне мојата молитва до Тебе, приклони го Своето уво кон мојот повик.

³Зашто мојата душа е наситена од страдања, мојот живот наближува кон Подземјето.

⁴Ме вбројуваат кон оние, што слегуваат во гроб, станав сличен на немоќниот.

⁵Моето легло е меѓу мртвите, како убиените што лежат во гробот, за кои веќе не се сеќаваш, од кои ја тргна раката.

⁶Ме смести во длабока јама, во темнини, во бездна.

⁷Тешко ме притиска Твојот гнев, и со сите Свои бранови ме прекриваш.

⁸Ги оддалечи од мене моите познати, направи да им бидам гнасен: затворен сум, не можам да излезам.

⁹Очите ми гаснат од тага: викам кон Тебе, Господи, секој ден, кон Тебе ја пружам раката.

¹⁰Зар над мртвите ќе правиш чудеса? Зар сенките ќе станат и ќе Те фалат?

¹¹Зар во гробот се раскажува за Твојата милост? За Твојата вистина во Гибелта?

¹²Зар во темнина се објавуваат Твоите чудеса и Твојата правда во Заборавот?

¹³Сепак, јас викам кон Тебе, Господи, пред мугрите, со молитва Те претекнувам.

¹⁴Зошто, Господи, ја отфрлаш мојата душа? Зошто го криеш лицето од мене?

¹⁵Беден сум и умирам веќе од детството, изнемоштев, носејќи ги Твоите морничавости.

¹⁶Преку мене минаа виорите на Твојот гнев, Твоите стравотии ме засекоа,

¹⁷секој ден, ме опкружуваат како вода, сите заедно ме обиколуваат.

¹⁸Ги оддалечи од мене: пријателот и другарот, мракот ми е единствен познаник.