Read Библија, Константинов Псалми 89 Bible Online

Псалми 89 - Библија, Константинов bible

Псалми 89

¹Учење на Етан Езрахит. За Господовата љубов ќе пеам довека, Твојата вистина ќе ја проповедам низ сите поколенија.

²Зашто реков: „Мојата љубов е создадена засекогаш!” Својата вистина ја втемели на небото:

³„Склучив Завет со Својот избраник, Му се заколнав на Својот слуга Давид:

⁴ќе го утврдам Твоето потомство довека, ќе го создадам твојот престол за сите родови.”

⁵Небесата ги величаат Твоите чудеса, Господи, и Твојата верност во собранието на светите.

⁶Зашто кој Му е рамен на Господа во облаците? Кој Му е сличен на Господа меѓу Божјите синови?

⁷Бог е стравичен во собранието на светите, велик и страшен за сите околу Себе.

⁸Господи, Боже над Воинствата, кој е како Тебе? Силен Си, Господи, и вистината Те опкружува.

⁹Ти му заповедаш на бурното море, ја скротуваш силата на неговите бранови;

¹⁰Ти го сосече и го згази Раав, со силна мишка ги распрсна Твоите непријатели.

¹¹Твои се небесата и Твоја е земјата, Ти го создаде земниот круг и сè што е на него;

¹²Ти создаде север и југ, Тавор и Ермон се радуваат на Твоето име.

¹³Твојата мишка е силна, раката цврста, десницата крената.

¹⁴Правдата и справедливоста се основа на Твојот престол, љубовта и вистината чекорат пред Тебе.

¹⁵Блазе му на народот свикнат со светите воскликнувања, тој оди во сјајот на Твоето лице, Господи.

¹⁶Секогаш се радува во Твоето име, и со Твојата правда се воздига.

¹⁷Зашто Ти си слава на неговата сила, по Твоја милост расте нашата сила.

¹⁸Зашто Господ е наш штит, Израелевиот Светец е наш Цар.

¹⁹Некогаш во видение им зборуваше на Своите свети: „На јунакот му ставив круна на главата, го издигнав избраникот од народот;

²⁰го најдов Давида, Својот слуга, го помазав со Своето свето масло,

²¹за да остане Мојата рака секогаш со него и Мојата мишка да го крепи.

²²Нема да го надмудри непријател, ниту да го превали синот на беззаконието.

²³Ќе ги разбијам пред него неговите противници, ќе ги погубам неговите мразители.

²⁴Мојата верност и Мојата добрина ќе бидат со него, и во Мое име ќе му расте силата.

²⁵Ќе ја испружам неговата рака до морето, неговата десница до Реката.

²⁶Тој ќе Ме вика: *Татко мој! Боже мој и карпа на моето спасение.*

²⁷А Јас ќе го направам првороденец, најголем меѓу царевите на светот.

²⁸За него ќе ги запазам довека: Мојата милост и Мојот верен Сојуз.

²⁹Ќе го направам вечно неговото потомство, и неговиот престол како небесен ден.

³⁰Ако неговите синови го остават Мојот Закон и не одат според Моите наредби;

³¹ако ги престапат Моите одредби и не ги чуваат Моите заповеди;

³²со прачка ќе го казнам нивното недело, со лути ударци нивната вина,

³³но нема да му ја одземам Мојата наклоност, ниту ќе ја прекршам Мојата вистина.

³⁴Нема да го нарушам Мојот Завет и не ќе го одречам Моето ветување.

³⁵Еднаш се заколнав во Мојата светост: нема да го измамам Давида.

³⁶Неговото потомство ќе остане довека, неговиот престол, пред Мене, како сонце.

³⁷Ќе остане довека како месечина, верен сведок на небото.”

³⁸А сега Ти го одби и го отфрли, многу се разгневи на својот помазаник.

³⁹Го презре Сојузот со Твојот слуга, и ја понизи до земја неговата круна.

⁴⁰Ги разурна сите негови ѕидови, ги фрли во урнатини неговите тврдини.

⁴¹Го ограбуваат сите што ќе поминат, стана за исмејување на своите соседи.

⁴²Ја подигна десницата на неговите напријатели, и ги зарадува неговите противници.

⁴³Ја затапи острицата на неговиот меч, не му помогна во бојот.

⁴⁴Му стави крај на неговиот блесок, го обори на земја неговиот престол.

⁴⁵Ги скрати дните на неговата младост, го покри со срам.

⁴⁶До кога, Господи? Зар ќе се криеш секогаш? Дали Твојот гнев ќе гори како оган?

⁴⁷Спомни си колку е краток мојот живот, во каква суета ги создаде сите човечки синови.

⁴⁸Кој жив не ќе ја види смртта? Кој ќе ја запази душата од раката на Подземјето?

⁴⁹Каде е, Господи, Твојата исконска добрина, со која му се заколна на Давида, за Својата верност?

⁵⁰Сети се, Господи, за срамот на своите слуги: во срцето ја носам сета омраза на многубошците,

⁵¹со која се нафрлаат Твоите непријатели, Господи, со која се нафрлаат на чекорите на Твојот помазаник.

⁵²Благословен да е Господ довека! Нека биде така. Амин.