Read Библија, Константинов Псалми 90 Bible Online

Псалми 90 - Библија, Константинов bible

Псалми 90

¹Молитва на Мојсеј, Божји човек. Господи, Ти ни беше засолниште од род до род.

²Пред да се родат планините, пред да суштествуваат копното и земскиот круг, од век до век, Боже, Ти си!

³Смртниците ги враќаш во прав и велиш: „Вратете се, човечки чеда!”

⁴Зашто илјада години во Твоите очи се: како вчерашниот ден што помина и како ноќната стража.

⁵Ги растеруваш како утрински сон, тие се како трева, што се зеленее:

⁶наутро цвета и сета се зеленее, а навечер се суши и вене.

⁷Навистина, Твојот гнев нè подјадува и нè збунува Твојата лутина.

⁸Нашите гревови ги стави пред Твоите очи, нашите потајни беззаконија во светлината на Твоето лице.

⁹Зашто сите наши денови минаа со Твој гнев, како воздишка ги завршивме своите години.

¹⁰Збирот на нашиот живот е седумдесет години, ако сме силни, и осумдесет; а повеќето од нив се мака и ништожност: зашто минуваат брзо, и ние летаме оттука.

¹¹Кој ќе ја мери жестокоста на Твојот гнев? Кој ќе проникне во Твојата лутина?

¹²Научи нè да ги броиме нашите дни, да придобиеме мудро срце.

¹³Врати се при нас, Господи! Па до кога? Биди им милостив на Своите слуги!

¹⁴Насити нè наутро, со Својата милост, за да се радуваме и да се веселиме во сите наши дни!

¹⁵Зарадувај нè за дните кога нè бичуваше, за годините кога страдавме многу!

¹⁶Нека се покаже Твоето дело врз Твоите слуги и Твојата слава врз нивните деца.

¹⁷Нека биде над нас добрината на Господа, нашиот Бог; дај ни да успее делото на нашите раце; нека успее делото на нашите раце.