Read Библија, Константинов Псалми 92 Bible Online

Псалми 92 - Библија, Константинов bible

Псалми 92

¹Псалм. Песна во саботен ден. Добро е да се слави Господ и да се пее на Твоето Име, Сèвишен;

²да се навестува Твојата љубов наутро и Твојата верност ноќе;

³на харфа со десет жици и на псалтир, со песна на лира.

⁴Зашто Ти ме развесели со Твоите дела, о Господи. Ќе се радувам на делата од Твоите раце.

⁵Колку се големи Твоите дела, Господи, и длабоки се Твоите замисли!

⁶Безумниот човек не сознава, и неукиот не сфаќа.

⁷И ако безбожниците никнуваат како трева, и ако цветаат сите, кои прават зло, одредени се за вечна пропаст;

⁸а Ти, Господи, остануваш возвишен довека.

⁹Навистина, Твоите непријатели, о Господи, Твоите врагови ќе пропаднат: ќе се распрснат сите, кои прават беззаконие.

¹⁰Ми го воздигна рогот како во бивол, ме помаза со пречисто масло;

¹¹и моето око гледа од високо на непријателите, и моите уши слушаат за оние, кои стануваат против мене.

¹²Праведникот цвета како палма, и расте како ливански кедар.

¹³Засадените во Господовиот Дом цветаат во дворовите на нашиот Бог.

¹⁴Тие и во старост донесуваат плодови: сочни и свежи:

¹⁵за да навестат дека Господ е праведен; моја Тврдина - и нема неправда во Него.