Read Библија, Константинов Изреки 10 Bible Online

Изреки 10 - Библија, Константинов bible

Изреки 10

¹ословици Соломонови: Мудриот син го радува таткото, а безумниот син е тага на својата мајка.

²Не ползува ништо нечесно богатство, додека праведноста избавува од смрт.

³Господ не остава да гладува душата на праведниот. но ја отфрла лакомоста на нечесните.

⁴Мрзливата рака го осиромашува човекот, а трудољубивата го збогатува.

⁵Кој собира лете, разумен син е, а кој спие во жетвата донесува срам.

⁶Благословите се над главата на праведникот, а устата на нечесните кријат насилство.

⁷Благословен е праведниковиот спомен, а името на нечесниот ќе изгние.

⁸Кој е со мудро срце, прима заповеди, додека брбливиот безумник пропаѓа.

⁹Кој живее непорочно, оди без страв, а кој оди по криви патишта, ќе се познае.

¹⁰Кој намигнува со окото, задава тага, а кој зборува лудо, пропаѓа.

¹¹Устата на праведниот се извор на живот, а устата на нечесниот крие насилство.

¹²Омразата предизвикува раздор, а љубовта ги покрива сите погрешки.

¹³Во усните на разумниот се наоѓа мудрост, а стапот е за плеќите на неразумниот.

¹⁴Мудрите го кријат знаењето, а устата на неразумните е близу до пропаста.

¹⁵Имотот на богатиот му е укрепен град, а на сиромашните сиромаштвото е нивна погибел.

¹⁶Праведниот печали за живот, а нечесниот печали за грев.

¹⁷Кој се придржува до поуките, е на патот на животот, а кој го отфрла укорот се заблудува.

¹⁸Лажливите усни ја кријат омразата, а кој шири клевети - безумен е!

¹⁹Изобилство зборови не бидува без грев, а кој го воздржува својот јазик, разумен е.

²⁰Праведниковиот јазик е одбрано сребро, а срцето на нечесниот е безвредно.

²¹Усните на праведниот се храна на мнозина, а глупавите умираат од недостаток на разум.

²²Господовиот благослов збогатува и не придодава никаква мака.

²³За безумниот е радост да направи срамно дело, а за разумниот да биде мудар.

²⁴Од што се плаши нечесниот, тоа ќе го најде, а желбата на праведниот се исполнува.

²⁵Како виорот што поминува, така го снемува нечесниот, а праведникот има вечна основа.

²⁶Какви се киселината за забите и димот за очите, таков е мрзливецот за оние што го праќаат.

²⁷Стравот од Господа ги умножува деновите, а на нечесните им се скратуваат годините.

²⁸Надежта на праведните е полна со радост, а надежта на нечесните пропаѓа.

²⁹Господовиот пат е закрила на праведникот, а пропаст за оние што прават зло.

³⁰Праведникот никогаш нема да се поколеба, а нечесните ќе ги снема од лицето на земјата.

³¹Од устата на праведникот блика мудрост, а лажливиот јазик ќе биде отсечен.

³²Усните на праведникот знаат што е благопријатно, додека устата на нечесните што е злобата.