Read Библија, Константинов Изреки 11 Bible Online

Изреки 11 - Библија, Константинов bible

Изреки 11

¹Лажната мерка гнасна е на Господа, а полната мерка му е угодна.

²Со гордоста доаѓа срамот, а мудроста е во смирените.

³Праведните ги води нивната невиност, а безбожниците ќе ги погуби нивното лукавство.

⁴Богатството не помага во денот на Божјиот гнев, а правдата избавува од смрт.

⁵На непорочниот правдата му го исправува неговиот пат, а нечесниот пропаѓа од својата нечесност.

⁶Справедливите ги избавува нивната правда, а беззакониците се фаќаат во својата злоба.

⁷Кога лошиот човек умре, надежта му пропаѓа, и надежта и очекувањето на грешникот се рушат.

⁸Праведникот се спасува од беда, а нечесниот доаѓа на неговото место.

⁹Лицемерот го убива, со устата, својот ближен, а праведниците се избавуваат со знаење.

¹⁰Градот се радува на успехот на праведниците и воскликнува заради пропаста на нечесниот.

¹¹Со благословот на праведните градот се воздига, а со устата на нечесните се разурнува.

¹²Неразумникот го презира својот ближен, додека умниот човек молчи.

¹³Кој оди со клеветата, ја открива тајната, а човек со верен дух ја чува тајната.

¹⁴Каде нема раководство народот пропаѓа, а при многу советници, тој се избавува.

¹⁵Многу лошо поминува кој емчи за друг, а без страв е кој го мрази емството.

¹⁶Благочестивата жена придобива слава, а трудољубивите мажи богатство.

¹⁷Милостивиот човек сам си прави добро, а жестокиот го измачува сопственото тело.

¹⁸Нечесниот човек придобива измамлива печалба, а кој сее правда, има сигурна награда.

¹⁹Кој е цврст во справедливоста, оди во живот, а кој трчи по злото, за смрт му е.

²⁰Одвратни му се на Господа нечесните во срцето, а непорочните во патот му се благоугодни.

²¹Навистина, зол човек не ќе помине без казна, а потомството на праведникот ќе се избави.

²²Златна обетка на носот на свињата: таква е убава жена а без разум.

²³Праведничката желба е само добро, а очекувањето на нечесните гнев.

²⁴Кој дели изобилно, сè повеќе има, а кој скржави сè е посиромашен.

²⁵Благотворната душа наоѓа поткрепа, а кој ги напојува другите, сам ќе се напои.

²⁶Кој не дава жито, народот го колне, а благословот е над главата на оној што го продава.

²⁷Кој се стреми кон добро, наоѓа милост, а кој оди по злото, тоа ќе го снајде.

²⁸Кој се надева на богатство, пропаѓа, а праведните ќе цветат како зелено лисје.

²⁹Кој ја запустува својата куќа, ќе наследи ветер, а неумниот му е слуга на умниот по срце.

³⁰Праведниковиот плод е дрво на животот, а мудрец е, кој придобива души.

³¹Ако на праведникот му се плаќа за заслуженото на земјата колку повеќе на нечесниот и на грешниот.