Read Библија, Константинов Изреки 12 Bible Online

Изреки 12 - Библија, Константинов bible

Изреки 12

¹Кој ја љуби поуката, го љуби знаењето, а кој го мрази укорувањето неук е.

²Добриот добива милост од Господа, а подмолниот осуда.

³Човекот не се зацврстува со беззаконие, а коренот на праведникот не се помрднува.

⁴Добродетелната жена е венец на својот маж, а срамотната е како гнилеж во неговите коски.

⁵Мислите на праведните се справедливи, а сплетките на нечесните се измамливи.

⁶Зборовите на нечесните се заседа за крвопроливање, а праведните ги избавува нивната уста.

⁷Нечесните се сосипуваат и веќе ги нема, а домот на праведникот останува.

⁸Човекот бидува пофалуван според остроумноста на својот разум, а опакиот во срцето ќе биде презрен.

⁹Подобро е да бидеш мал и да имаш само еден слуга, отколку да се издигаш, а да немаш ни леб.

¹⁰Праведникот внимава и на животот на својот добиток, додека на нечесниот срцето му е свирепо.

¹¹Кој ја обработува својата земја, наситен е со леб, а кој трча по суетата, неразумен е.

¹²Копнежот на нечесниот е мрежа од зло, а коренот на праведникот дава плод.

¹³На нечесниот стапица му е гревот на неговата уста, а праведникот се избавува од беда.

¹⁴Од плодот на својата уста секој ќе се насити изобилно, а она што го направил со рацете, ќе му се врати.

¹⁵На лудиот му се чини прав неговиот пат, а мудриот човек слуша совети.

¹⁶Безумникот веднаш го покажува својот бес, а умниот го покрива срамот.

¹⁷Кој говори вистина, открива што е право, а лажниот сведок - измамата.

¹⁸Невнимателниот зборува како да прободува со меч, а јазикот на мудрите е исцелување.

¹⁹Вистинита уста трае довека, а лажливиот јазик само за миг.

²⁰Измамата е во срцето на оние, кои смислуваат зло, а радост во оние што делат мирољубиви совети.

²¹Праведникот не го стигнува никаква неволја, а нечесните се исполнети со зло.

²²Одвратни Му се на Господа лажливите усни, а Му се мили кои зборуваат вистина.

²³Благоразумниот човек го прикрива своето знаење, а безумничкото срце ја разгласува својата глупост.

²⁴Трудољубивата рака ќе владее, а безгрижните ќе одат кон подложност.

²⁵Грижата во срцето го притиска човекот, а добриот збор го весели.

²⁶Праведникот го води својот пријател, а нечесните ги заблудува нивниот пат.

²⁷Мрзливиот нема да го улови својот лов, а трудољубието е скапоцено благо за човекот.

²⁸Животот стои врз патеката на правдата, и на нејзиниот пат нема смрт.