Read Библија, Константинов Изреки 14 Bible Online

Изреки 14 - Библија, Константинов bible

Изреки 14

¹Мудрата жена го изградува нејзиниот дом, а лудата го разурнува со рацете.

²Кој живее од чесност, се бои од Господа, а кој оди по страничен пат, Го презира.

³Во устата на лудиот е прачката за неговата гордост, а мудроста ја пазат сопствените усни.

⁴Каде нема волови, јаслите се празни, а жетвата е изобилна од силата на воловите.

⁵Вистинскиот сведок не лаже, а лажниот сведок шири лага.

⁶Потсмевачот бара мудрост и не ја наоѓа, а разумниот лесно доаѓа до знаење.

⁷Оди си од безумниот човек, зашто нема да запознаеш усни што зборуваат знаење.

⁸Мудроста на мудриот човек е во тоа: што внимава на својот пат, а глупоста на безумникот е заблуда.

⁹На лудите гревот им е шега, а среде праведните е Божјата наклонетост.

¹⁰Срцето ја познава својата душевна мака, и неговата радост не може да ја дели никој друг.

¹¹Домот на нечесните ќе пропадне а живеалиштето на праведниците ќе процвета.

¹²Некој пат му се чини на човекот прав, а на крајот води кон смртта.

¹³И во смеата срцето чувствува болка, а после веселбата доаѓа тага.

¹⁴Лукавиот се сити со своите престапи, а добриот човек со својот труд.

¹⁵Глупавиот верува на секој збор, а умниот внимава на својот чекор.

¹⁶Мудриот се бои и се отклонува од злото, а безумниот се распалува и е смел.

¹⁷Избувливиот човек прави лудости, и зломисленикот ќе биде замразен.

¹⁸Глупавите ја наследуваат лудоста, а мудрите ги овенчува знаењето.

¹⁹Лошите се поклонуваат пред добрите, и нечесните пред вратите на праведникот.

²⁰Сиромавиот им е омразен и на своите пријатели, а богатиот има многу другари.

²¹Греши кој го презира својот ближен, а блазе на оној кој е милостив кон сиромасите.

²²Не одат ли по заблуда оние што смислуваат зло? А зар не се добрината и верноста со оние што смислуваат добро.

²³Од секој труд има полза, а од брбливоста на усните само сиромаштво.

²⁴На мудрите венец им е нивното богатство, а глупоста на безумните е нивната лудост.

²⁵Вистинскиот сведок избавува души, а лажниот сведок истура лаги.

²⁶Во стравот од Господа е голема верба, и е прибежиште за неговите синови.

²⁷Стравот од Господа е извор на животот; Тој избавува од стапицата на смртта.

²⁸Многуброен народ е слава за царот, а без луѓе владетелот пропаѓа.

²⁹Кој се гневи бавно има големо разбирање, а избувливиот во дух покажува глупост.

³⁰Тивкото срце е живот на телото, а љубомората е гнилеж во коските.

³¹Кој го угнетува бедниот, го навредува неговиот Творец, а кој е милостив кон бедниот Го почитува.

³²Нечесниот пропаѓа заради сопствената пакост, а праведникот и при самата смрт наоѓа засолниште.

³³Мудроста почива во разумно срце, а што е во безумниот тоа и се покажува.

³⁴Правдата го возвишува народот, а гревот е срам на народите.

³⁵Царската наклонетост е кон разумниот слуга а неговиот гнев - против оној кој го срами.