Read Библија, Константинов Изреки 15 Bible Online

Изреки 15 - Библија, Константинов bible

Изреки 15

¹Благиот одговор ја ублажува јароста, а грубиот збор го зголемува гневот.

²Јазикот на мудрите луѓе го прославува знаењето, а устата на безумните истурува глупост.

³Господовите очи се на секое место и ги набљудуваат и лошите и добрите.

⁴Благиот јазик е дрво на животот, а пакосниот е рана за духот.

⁵Безумниот ја презира поуката на својот татко, а кој прима укор, е благоразумен.

⁶Во праведниковиот дом има големо изобилство, а нечесниот ја печали својата пропаст.

⁷Усните на мудрите сеат знаење, а срцето на безумникот е непостојано.

⁸Жртвата на нечесниот Му е омразена на Господа, а мила Му е молитвата на праведните.

⁹Патот на нечесните Му е омразен на Господа, а возљубен Му е оној, кој оди по правдата.

¹⁰Тешка казна го чека оној кој го остава правиот пат, а ќе умре кој го мрази изобличувањето.

¹¹И Пеколот и Гибелта стојат пред Господа, а колку повеќе срцата на човечките синови.

¹²Потсмевачот не го љуби оној што го кори: тој не се дружи со мудрите.

¹³Веселото срце го разведрува лицето, а болката во срцето тешкотија е за духот.

¹⁴Разумното срце бара знаење, а безумничката уста се занимава со глупост.

¹⁵За натажениот сите денови се зли, а кому срцето е весело, на гозби е постојано.

¹⁶Подобро е малку со страв од Господа, отколку големо богатство и немир со него.

¹⁷Подобар е оброк со зеленчук каде е љубовта, отколку згоен вол каде е омразата.

¹⁸Гневливиот човек заметнува препирка, а стрпливиот ја стивнува расправата.

¹⁹Патот на мрзливиот е како глогово трниште, а патеката на праведникот е разгазена.

²⁰Мудриот син го весели таткото, а безумниот ја презира својата мајка.

²¹Лудоста е веселба за неразумниот, а разумниот човек оди право.

²²Не успеваат намерите, каде што нема советување, а се остваруваат каде има многу советници.

²³Човекот се радува на одговорот на својата уста, и зборот во право време колку е добар!

²⁴За разумниот човек патот на животот оди нагоре, за да се отстрани од пеколот, што е долу.

²⁵Господ го разурнува домот на гордите, а ја поставува меѓата на вдовицата.

²⁶Омразени му се на Господа лошите мисли, а чистите зборови му се мили.

²⁷Користољубивиот го разурнува својот дом, а кој го мрази поткупот, ќе живее.

²⁸Праведниковото срце смислува одговор, а устата на нечесниот зборува злоба.

²⁹Далеку е Господ од нечесните, а ја слуша молитвата на праведните.

³⁰Бистриот поглед го развеселува срцето, и радосната вест ги гои коските.

³¹Увото што го послушува спасоносното изобличување живее меѓу мудреците.

³²Кој отфрла поука ја презира сопствената душа, а кој прима поправка, се здобива со разум.

³³Стравот од Господа е училиште на мудроста, зашто смиреноста оди пред славата.