Read Библија, Константинов Изреки 18 Bible Online

Изреки 18 - Библија, Константинов bible

Изреки 18

¹Себичниот ја сака само својата желба; и се противи на секое здраво расудување.

²Глупецот нема наслада во знаењето, нему му е само да си го искажува срцето.

³Кога доаѓа нечесниот, доаѓа и презирот, а со нечесноста доаѓа прекорот.

⁴Зборовите од човечката уста се длабоки води, извор на мудрост - порој што се разлива.

⁵Не е добро: да се обѕира на нечесна личност, да му се нанесе неправда на праведникот во судот.

⁶Безумниковите усни се впуштаат во препирки, и неговата усна предизвикува удари.

⁷Сопствената уста е пропаст за безумниот, и усните му се примка за неговата душа.

⁸Клеветниковите зборови се како слатки: се спуштаат до дното на утробата.

⁹Кој е негрижлив во својата работа брат му е на расипникот.

¹⁰Господовото име е цврста кула: праведникот прибегнува кон него и наоѓа засолниште.

¹¹Имотот на богатиот е утврден град, и како висок ѕид во неговото мечтаење.

¹²Пред загинувањето се гордее човековото срце, а пред славата оди смиреноста.

¹³Кој одговара пред да чуе, тоа му е лудост и срам.

¹⁴Кога е човекот болен неговиот дух го подига, а поразениот дух, кој може да го подигне?

¹⁵Разумното срце придобива знаење, и увото на мудрите бара знаење.

¹⁶Подарокот му отвора пат на човекот и го води пред големците.

¹⁷Кој прв го заштитува своето дело се чини дека е прав, а кога ќе дојде неговиот сосед го испитува.

¹⁸Жрепката ги прекратува споровите, и одлучува меѓу силните.

¹⁹Навредениот брат е појак од цврст град, и расправите се како лостови на тврдина.

²⁰Секој го наситува желудникот со плодот на својата уста, се наситува со родот на своите усни.

²¹Смртта и животот се во власта на јазикот, а кој го милува, јаде од неговиот плод.

²²Кој нашол добра жена, ја нашол среќата и добил милост од Господа.

²³Бедниот зборува молејќи понизно, а богатиот одговара грубо.

²⁴Има пријатели кои водат во пропаст, а има и пријател поприврзан од брат.