Read Библија, Константинов Изреки 20 Bible Online

Изреки 20 - Библија, Константинов bible

Изреки 20

¹Виното е потсмевнувач, жестокиот пијалак буен; и кој им се оддава, не е разумен.

²Царевиот гнев е како лавско рикање; кој го предизвикува, греши против самиот себе.

³Чест е за човекот да се воздржи од препирка, а кој е безумен, ја почнува препирката.

⁴Мрзливиот несака да оре поради зимата, во времето на жетвата тој бара и ништо нема.

⁵Советот во човековото срце е длабока вода, и разумниот човек ќе ја исцрпи.

⁶Мнозина се наречуваат: добротвори, но кој ќе најде верен човек?

⁷Праведникот оди во својата непорочност, блазе им на неговите синови по него!

⁸Царот кој седнува на судиска столица, го истражува секое зло со своите очи.

⁹Кој може да рече: „Го очистив своето срце, јас сум чист од мојот грев?”

¹⁰Двојните тегови и двојните мерки, двете Му се омразени на Господа.

¹¹И детето се познава според она што го прави, дали е чисто и праведно неговото дело.

¹²И увото што слуша и окото што гледа, Господ ги направи двете.

¹³Не сакај го спиењето за да не осиромашиш, отвори ги своите очи, и ќе се наситиш со леб.

¹⁴„Лошо, лошо”, зборува купувачот, а кога ќе си отиде се фали.

¹⁵Има злато и многу бисери, но мудрите усни се најскапоцен накит.

¹⁶Земи му ја облеката на оној кој емчи за друг; ограби го него место туѓинецот.

¹⁷Сладок му е на човекот лебот на измамата, но после устата му се наполнува со песок.

¹⁸Намерите се спроведуваат со совет; затоа размисли добро па води војна!

¹⁹Кој клевети наоколу, открива тајни; затоа не се мешај со оној, кому усните секогаш му се отворени.

²⁰Кој ги проколнува татко си и мајка си, светилката му се гаси среде густа темнина.

²¹Од почетокот набрзина придобиено наследство, на крајот не е благословено.

²²Не зборувај: „Ќе се одмаздам за злото”, остави Му на Господа и Тој ќе те избави.

²³Омразени Му се на Господа двојните тегови, и кривата мерка не чини.

²⁴Од Господа се човековите чекори, и како може човекот да го разбере својот пат?

²⁵Стапица е за човекот да рече непромислено: „Ова е свето”, а после да се предомисли што заветувал.

²⁶Мудриот цар умее да ги просејува нечесните, и ги става под тркала.

²⁷Човековиот дух е Господова светилка која ја испитува сета внатрешност на срцето.

²⁸Милоста и верноста го чуваат царот, зашто со милоста го зацврстува својот престол.

²⁹Убавината на младите е нивната сила, а седата коса е украс на старците.

³⁰Синилото од биење го очистува злото, а ударите внатрешноста на срцето.