Read Библија, Константинов Изреки 23 Bible Online

Изреки 23 - Библија, Константинов bible

Изреки 23

¹Кога ќе седнеш да јадеш со началник, внимавај добро што е пред тебе;

²стави си нож под грлото ако си ненаситник.

³Не посакувај ги неговите слатки јадења, зашто се измамливи гозби.

⁴Не труди се да придобиеш богатство, откажи се од таквата мисла;

⁵насочиш ли ги очите кон него, него веќе го нема, зашто си направило крилја како орел и летнало кон небото.

⁶Не јади јадења на завидливиот, не копнеј по неговите слатки јадења,

⁷зашто тој е таков како што мисли во себеси: „Јади и пиј”, ти вели, но неговото срце не е со тебе.

⁸Залокот што си го изел, ќе го повратиш, напразно ќе ги изгубиш своите љубезни зборови.

⁹Не зборувај пред безумник, зашто ги презира твоите умни зборови.

¹⁰Не преместувај ги старите меѓи и не навлегувај во нивата на сираците,

¹¹зашто е моќен нивниот Заштитник, ќе го брани нивното право против тебе.

¹²Сврти го своето срце кон поуката и своето уво кон мудри зборови.

¹³Не лишавај му ја на детето опомената, зашто, ако го удриш со прачка, нема да умре;

¹⁴го биеш со прачка, ама му ја избавуваш душата од пеколот.

¹⁵Сине мој, кога ти е срцето мудро и јас се радувам од срце;

¹⁶и ќе воскликнува сета моја внатрешност, кога твоите усни зборувааат што е право.

¹⁷Нека твоето срце не им завиди на грешниците, туку нека секогаш ти биде во страв од Господа;

¹⁸зашто ќе имаш иднина, и твојата надеж нема да пропадне.

¹⁹Слушај, сине мој, и биди мудар и води го твоето срце по рамен пат.

²⁰Не дружи се со винопијачите, ниту со месојадачите,

²¹зашто пијаницата и изедникот осиромашуваат, и дремливиот се облекува во партали.

²²Слушај го својот татко, својот родител, и не презирај ја мајката кога ќе остари.

²³Купувај вистина и не ја продавај, придобивај мудрост, поука и разум.

²⁴Многу ќе се радува таткото на праведникот, и кој раѓа мудар син ќе има милина во него.

²⁵Нека се веселат татко ти и мајка ти, и нека се радува твојата родителка.

²⁶Сине мој, дај ми го своето срце и нека твоите очи внимаваат на моите патишта,

²⁷зашто блудницата е длабока јама, и туѓинката тесен кладенец.

²⁸Таа дебне во заседа како крадец и го зголемува бројот на безбожниците меѓу луѓето.

²⁹Кому ах? Кому: леле? Кому: препирки? Кому: воздишки? Кому: рани за ништо? Кому: заматени очи?

³⁰На оние што седат доцна покрај виното, што дошле да го испитуваат зачинетото вино.

³¹Не гледај на виното кога се црвенее, кога се прелева светливо во чашата: се пие така глатко,

³²а на крај каснува како змија и жилосува како змија лутица.

³³Твоите очи ќе гледаат туѓи жени и срцето ќе зборува развратно.

³⁴И ти ќе бидеш како да лежиш среде морето или како да седиш на врвот на јарбол.

³⁵„Ме избија, ама не ме заболе, ме претепаа, ама не почувствував; кога ќе отрезнам, уште ќе барам.”