Read Библија, Константинов Изреки 24 Bible Online

Изреки 24 - Библија, Константинов bible

Изреки 24

¹Не завиди им на нечесните луѓе, ниту посакувај да бидеш со нив,

²зашто нивното срце смислува насилство и усните зборуваат за зло.

³Со мудрост се гради куќа, и со разумност се утврдува,

⁴и преку знаење се полнат собите со секакви благопријатни и скапоцени богатства.

⁵Мудриот човек се зацврстува, и човек со знаење расте во сила.

⁶Зашто со размислување се оди во војна, и победата е од многу советници.

⁷За безумниот мудроста е превисока, затоа на судот не ја отвора својата уста!

⁸Кој смислува зло, се вика подмолен сплеткар.

⁹Мислата на безумникот е грев, и потсмевачот им е омразен на луѓето.

¹⁰Ако покажеш малодушност во ден на беда, твојата сила е мала.

¹¹Избави ги оние кои ги влечат во смрт, и спасувај ги оние што одат на губилиште.

¹²Ако речеш: „Не знаевме за тоа, не разбира ли Оној, кој ги испитува срцата? И не знае ли Оној, Кој ти ја чува душата? И не плаќа ли Тој секому според неговите дела?

¹³Јади мед, сине мој, зашто е пријатен, и саќите се слатки на твоето грло,

¹⁴така е знај, и мудроста за твојата душа: ако ја најдеш, ја најде иднината, и твојата надеж нема да пропадне.

¹⁵Не поставувај нечеснику, заседа на праведниковото живеалиште; не прави насилство на неговото мирно престојувалиште;

¹⁶зашто, ако праведникот падне и седумпати, тој станува, а нечесните пропаѓаат во несреќа.

¹⁷Не се радувај кога ќе падне твојот непријател, и не воскликнувај со срцето кога ќе се подлизне,

¹⁸за да не види Господ и за да не го земе тоа за зло, па да го сврти Својот гнев од него кон тебе.

¹⁹Не се гневи заради злочинците, не им завиди на нечестивите,

²⁰зашто лошиот човек нема иднина, светилката на нечесните гасне.

²¹Бој се од Господа, сине мој, и од царот: и не се дружи со променливи луѓе,

²²зашто одненадеж доаѓа нивната погибел; и кој знае кога бедата ќе дојде од обата?

²³И ова е од мудреците: Не чини да се биде пристрасен на суд.

²⁴Кој му вели на нечесниот: „Праведен си!” Ќе го проколнуваат народите и ќе го мразат племињата;

²⁵а оние што го укоруваат, ќе бидат возљубени и врз нив ќе дојде благословот.

²⁶Кој одговара чесно, љуби во уста.

²⁷Сврши ја својата работа надвор и приготви ја својата нива, потоа изгради ја и својата куќа.

²⁸Не сведочи лажно против својот ближен; зар ќе мамиш со своите усни?

²⁹Не зборувај: „Како што тој ми направи мене, така ќе му направам и јас нему; ќе му платам на тој човек според неговото дело!”

³⁰Поминував покрај нивата на некој мрзливец, и покрај лозјето на некој безумник;

³¹и ете, сè беше зарастено во коприви, трњето ја покриле површината, и камената ограда беше разурната.

³²Го видов тоа и го запазив во срцето, разгледав и зедов поука:

³³„Уште малку поспи, уште малку подреми, уште малку свиткај ги рацете за починка,

³⁴и ќе дојде твоето сиромаштво како скитник, и немаштијата како вооруженик!”