Read Библија, Константинов Изреки 28 Bible Online

Изреки 28 - Библија, Константинов bible

Изреки 28

¹Неправедните бегаат и кога никој не ги гони, а праведниците се смели како млад лав.

²Кога се греши во земјата, управителите и се многу, а со разумен и умен човек управата е постојана.

³Бедниот човек, кој ги угнетува слабите, е пороен дожд, по кого нема леб.

⁴Отстапниците од Законот ги величаат нечесните, а кои го пазат Законот им се противат.

⁵Лошите луѓе не ја разбираат правдата, а кои Го бараат Господа, разбираат сè.

⁶Подобар е бедниот, кој живее непорочно, отколку богатиот, кој чекори по крив пат.

⁷Кој го пази Законот, е разумен син, а кој се дружи со ненаситниците го срамоти татка си.

⁸Кој го умножува своето богатство со заемодавство и придобивки, го собира за оној, кој е милостив кон сиромашните.

⁹Кој го отклонува своето уво, за да не го слуша Законот, и неговата молитва е омразена.

¹⁰Кој ги заведува чесните на лош пат, ќе падне во својата јама, а чесните ќе го наследат доброто.

¹¹Богатиот човек се смета мудар за себеси, но разумниот сиромав ќе го разобличи.

¹²Голема слава е кога се радуваат праведниците, а кога се издигаат нечесните, луѓето се кријат.

¹³Кој ги крие своите престапи нема успех, а кој ги исповеда и се одречува од нив, наоѓа милост.

¹⁴Блажен е човек, кој секогаш се бои, зашто човек со тврдо срце запаѓа во несреќа.

¹⁵Лав што рика и гладна мечка: таков е опакиот владетел за бедниот народ.

¹⁶Неразумниот управител прави многу насилства, а кој ја мрази лакомоста, живее долго.

¹⁷Човек кој е виновен за пролевање на човечка крв, бега до гроб: не застанувајте го.

¹⁸Кој живее праведно, се спасува, кој оди по криви патишта, пропаѓа на еден од нив.

¹⁹Кој ја обработува својата земја, ќе се насити со леб, а кој трча по суетите, ќе се насити со сиромаштво.

²⁰Чесниот човек изобилува со благослови, а кој брза по богатство, не останува без казна.

²¹Не чини да се биде пристрасен на суд, зашто и за залак леб човекот прави зло.

²²Лакомецот брза по богатството, а не знае дека ќе го стигне скудноста.

²³Кој го изобличува човекот, после ќе најде поголема милост, отколку оној, кој ласка со својот јазик.

²⁴Кој ги ограбува татка си и мајка си и вели: „Не е грев”, другар му е на разбојникот.

²⁵Срцето на горделивецот зафаќа препирка, а кој се надева на Господа, ќе напредува.

²⁶Безумен е кој се надева на своето срце, а се спасува кој живее мудро.

²⁷Кој му дава на бедниот, не трпи скудност; а кој ги одвраќа своите очи, ќе биде проклет.

²⁸Кога се издигаат нечесните, луѓето се кријат, а кога пропаѓаат, тогаш се умножуваат праведниците.