Read Библија, Константинов Изреки 29 Bible Online

Изреки 29 - Библија, Константинов bible

Изреки 29

¹Човекот кој по опомената останува тврдоглав, во миг ќе се скрши и нема да му има лек.

²Народот се радува кога се умножуваат праведниците, а народот воздивнува, кога ќе завладеат нечесните.

³Човек кој ја љуби мудроста, го радува татка си, а кој се дружи со блудниците, го растурува имотот.

⁴Царот ја одржува државата со правда, а ја разурнува кој бара подароци.

⁵Човек кој му ласка на својот ближен, им простира мрежи на неговите стапки.

⁶Во гревот е стапицата за лошиот човек, а праведникот ликува и се весели.

⁷Праведникот го разбира правото на бедните, а нечесниот не вникнува за да сфати.

⁸Потсмевачите го запалуваат градот, а мудрите го стивнуваат гневот.

⁹Кога мудриот спори со безумникот, или да се гневи, или да се смее, сеедно, нема мир.

¹⁰Крвопијците го мразат чесниот, а праведниците се грижат за неговиот живот.

¹¹Безумникот го излева сиот свој гнев, а мудриот го воздржува.

¹²Ако владетелот послуша лажлив збор, сите негови слуги стануваат нечесни.

¹³Сиромавиот и дерикожецот се среќаваат, Господ ги просветлува очите на двајцата.

¹⁴Цар кој им суди на бедните според правдата, има цврст престол довека.

¹⁵Прачката и изобличувањето даруваат мудрост, а разузданото дете ја срами својата мајка.

¹⁶Кога се множат нечесните, се множи и беззаконието, но праведниците ја набљудуваат нивната пропаст.

¹⁷Изобличи го својот син, и ќе те успокои и ќе и даде радост на твојата душа.

¹⁸Каде нема откровение пророчко народот се разуздува, а кој го пази Законот е блажен!

¹⁹Само со зборови не се поправува слугата, зашто не се покорува, иако сфаќа со умот.

²⁰Дали си видел човек брз на зборови? И безумникот има повеќе надеж од него.

²¹Кој го мазни својот слуга од детство, после ќе му биде како син.

²²Гневливиот човек предизвикува препирки, а избувливиот човек прави многу гревови.

²³Гордоста го понижува човекот, а смирениот во дух придобива чест.

²⁴Кој со крадец дели плен, се мрази самиот: слуша проклетства и ништо не открива.

²⁵Стравот му поставува стапица на човекот, а кој се надева на Господа, наоѓа закрила.

²⁶Мнозина ја бараат милоста на владетелот, но Господ дели правда секому.

²⁷Неправедникот им е омразен на праведните, а праведникот е омразен на нечесните.