Read Библија, Константинов Изреки 6 Bible Online

Изреки 6 - Библија, Константинов bible

Изреки 6

¹Сине мој, кога емчиш за својот ближен, и ја дадеш својата рака на друг,

²си се врзал со сопствените усни, си се врзал со зборовите на својата уста.

³Направи го тогаш ова сине мој, ослободи се! Зашто си паднал во рацете на својот ближен: оди, падни пред него и моли го својот ближен.

⁴Не давај им сон на своите очи ни дремка на своите клепки.

⁵Истргај се како газела од раката на ловецот и како птица од рацете на птичарот.

⁶Оди при мравката, о мрзливецу набљудувај ги нејзините патишта и биди мудар:

⁷Таа нема водич, надзорник ни настојник,

⁸се грижи за храната лете и прибира јадење во време на жетвата.

⁹А ти, мрзливецу, до кога ќе спиеш? Кога ќе се разбудиш од својот сон?

¹⁰Уште малку поспиј, уште малку подреми, уште малку свиткај ги рацете за одмор,

¹¹и ќе дојде твоето сиромаштво како скитник, и твојата скудност како вооруженик.

¹²Лукавиот човек, нечесниот човек, оди со лажлива уста,

¹³намигнува со очите, тропа со нозете, покажува со прстите;

¹⁴измамите му се во срцето, сонува зло во секое време, сее раздори.

¹⁵Затоа пропаста ќе му дојде одненадеж, и во миг ќе се скрши и нема да му има лек.

¹⁶Шест нешта мрази Господ, а седум се гнасни на Неговата душа:

¹⁷Горделиви очи, лажлив јазик, раце што пролеваат невина крв,

¹⁸срце што замислува грешни мисли, нозе што итаат на зло,

¹⁹лажен сведок, кој шири лага, и човек кој сее раздори меѓу браќата.

²⁰Сине мој, пази ги заповедите на својот татко и не отфрлај ја науката на својата мајка.

²¹Врзи ги за своето срце засекогаш, завиткај ги околу своето грло;

²²за да те водат кога одиш, да те чуваат кога спиеш, и да разговараат со тебе кога ќе се разбудиш.

²³Зашто заповедта е светилник, законот е светлина, опомените на изобличувањата се пат кон животот;

²⁴за да те чуваат од зла жена, од ласкавиот јазик на туѓинката.

²⁵Не посакувај ја во своето срце нејзината убавина, и не оставај да те освои со своите клепки,

²⁶зашто поради блудница човек се понижува и за парче леб, додека прељубницата лови скапоцен живот.

²⁷Може ли некој да носи оган во пазувите, а да не му се запали облеката?

²⁸Може ли некој да оди по вжарени јаглени, а да не си ги изгори своите нозе?

²⁹Така биднува со оној кој оди при жената на својот ближен: Не ќе остане без казна оној што ќе се допре до неа.

³⁰Не го срамат ли крадецот, па иако крадел за да го смири гладот:

³¹Фатен, тој враќа седмократно и плаќа со сиот имот на својата куќа.

³²И така, неразумен е оној, кој се впушта со прељубница, својата душа ја губи кој прави така.

³³Ќе дојде посрамување и срам, и неговиот срам не се брише никогаш.

³⁴Зашто бесна е љубоморноста во мажот: тој не знае за милост во одмаздничкиот ден;

³⁵не се согласува на никаков откуп, и не прима дарови, колку и да му дадеш.