Read Библија, Константинов Изреки 8 Bible Online

Изреки 8 - Библија, Константинов bible

Изреки 8

¹Не проповеда ли мудроста, и не подига ли го својот глас разумот?

²На врвот на ридот, покрај патот, на раскрниците стои;

³при излезот од градот крај влезните врати, таа вика гласно:

⁴„Вам ви проповедам, о луѓе, и го насочувам својот глас кон човечките синови!

⁵Сфатете ја мудроста, вие неискусни, а вие неразумни, вразумете го срцето.

⁶Слушајте, зашто ќе зборувам за важни нешта, и моите усни ќе откријат што е право,

⁷зашто мојот јазик ја зборува вистината, а нечесноста е гнасна за моите усни.

⁸Сите зборови на мојата уста се праведни, во нив нема ништо ни криво ни лукаво.

⁹Сите тие се јасни за разумниот и праведни се за оној, кој придобил знаење.

¹⁰Примајте ја мојата поука а не сребро, и знаењето е подобро од златото.

¹¹Зашто мудроста е поскапоцена од бисери, и никакви скапоцености не можат да се споредат со неа.

¹²Јас, мудроста живеам со разумот и имам расудувачко знаење.

¹³Стравот од Господа е омраза кон злото. Јас ги мразам: гордоста, самодостатноста, патот на лошото и уста полна со лаги.

¹⁴Мои се советот и здравото мислење, јас сум разум, и моја е силата.

¹⁵Преку мене царевите царуваат и началниците делат правда.

¹⁶Преку мене кнезовите кнезуваат и големците и сите земни судии.

¹⁷Јас ги љубам оние кои ме љубат мене, и ме наоѓаат кои ме барат.

¹⁸Богатството и славата се во мене, постојаното добро и справедливоста.

¹⁹Мојот плод е подобар од чистото и најчистото злато, и мојот приход е подобар од чистото сребро.

²⁰Јас чекорам по патот на правдата, среде справедливите патеки,

²¹да им дадам имот на оние кои ме љубат и да ги наполнам нивните сокровишта.

²²Господ ме имаше во почетокот на Својот пат, пред Своите созданија, многу одамна.

²³Вообличена сум уште од вечноста, од почеток, пред создавањето на земјата.

²⁴Се родив кога уште немаше бездни, додека немаше извори на изобилни води.

²⁵Се родив пред да бидат основани горите, пред бреговите;

²⁶кога уште не ги имаше создадено земјата ни полињата, ни почетокот на земниот прав.

²⁷Кога ги создаваше небесата, бев присутна, кога распростираше свод над лицето на бездната;

²⁸кога ги зацврстуваше облаците во височината и кога ја одреди силата на изворот на прадлабочината.

²⁹Кога му ги поставуваше на морето неговите граници, за да не му се прелеат водите преку бреговите, кога ги поставуваше основите на земјата,

³⁰бев покрај Него, како градежничка, бев радосна, од ден на ден, радувајќи се пред Него сето време:

³¹Се радував по почвата на Неговата земја, и мојата радост се човечките синови.

³²Така, деца, послушајте ме, блазе им на оние кои ги чуваат моите патишта.

³³Послушајте ја поуката, за да добиете мудрост и не ја отфрлајте.

³⁴Блазе му на човекот што ме слуша, и бдее пред моите врати секој ден, и кој ги чува моите довратници.

³⁵Зашто кој ме наоѓа мене, го наоѓа животот и добива милост од Господа.

³⁶А ако згреши кон мене, и пакости на својата душа: Сите што ме мразат мене, ја љубат смртта.”