Read Библија, Константинов П.надПесн. 1 Bible Online

П.надПесн. 1 - Библија, Константинов bible

П.надПесн. 1

¹Соломоновата Песна над песните

²Бакни ме со бакнеж на својата уста, твојата љубов е послатка од вино.

³Мирис на најдобрите мириси, твоето име е разлеано масло, затоа те љубат девиците.

⁴Повлечи ме по себе, да бегаме! Царот ме воведе во своите соби. Ќе се веселиме и ќе се радуваме заради тебе, ќе ја славиме твојата љубов повеќе од виното; достојно е да те љубат!

⁵Ерусалимски ќерки, црна сум, но убава, како кедровите шатори, како Соломоновите завеси.

⁶Не гледајте дека сум поцрнета, зашто сонцето ме опали. Синовите на мајка ми се разгневија на мене, ме поставија да ги чувам лозјата; а моето лозје, не го чував.

⁷Кажи ми ти, кого го љуби мојата душа: каде пасеш? Каде одмараш на пладне? за да не скитам, барајќи те, околу стадата на твоите другари!

⁸Ако не го знаеш тоа, о, најпрекрасна меѓу жените, излези и следи ги трагите на стадата, и паси ги твоите јариња околу пастирските шатори.

⁹Те споредувам со коњите во фараоновите коли, моја возљубена.

¹⁰Прекрасни се твоите образи меѓу ушниците; твојот врат со ѓерданите;

¹¹ќе направиме златни обетки, за тебе, со сребрени приврзоци.

¹²Додека царот се одморува на своите постели, мојот нард мириса.

¹³Мојот возљубен е како страк смирна, што почива меѓу моите гради.

¹⁴Мојот возљубен е како кипров грозд од енгадските лозја.

¹⁵О, ти си прекрасна, моја возљубена; колку си убава! имаш очи како гулабица.

¹⁶О, ти си прекрасен, мој возљубен, и љубезен! Зеленилото е наша постела.

¹⁷Кедрите се греди на нашите куќи, а кипарисите покрив.