Read Библија, Константинов Исаија 1 Bible Online

Исаија 1 - Библија, Константинов bible

Исаија 1

¹Видение на Исаија, синот Амосов, што го имаше за Јудеја и за Ерусалим, во деновите на Озиј, Јоатан, Ахав и Езекија, јудејски цареви.

²Чујте, небеса, послушај, земјо, зашто говори Господ: „Ти ги воспитав, ги подигнав, синовите, ама тие се одметнаа од Мене.

³Волот го познава својот сопственик, а оселот јаслите на господарот - Израел не познава, Мојот народ не разбира.”

⁴Ох, грешен ли народ, луѓе загазени во зло, злосторнички род, расипани синови! Го оставија Господа, Го презреа Израелевиот Светец, Нему Му ги свртија плеќите.

⁵Па каде да ве удрам уште, кога и понатаму се бунтувате? Целата глава е болна, срцето изнемоштено;

⁶од петицата до главата никаде здраво место, туку повреди, синила, отворени рани, ни очистени, ни завиткани, ниту заблажени со масло.

⁷Земјата ви опусте, градовите оган ги спали, туѓинците ги ограбуваат вашите ниви, пред ваши очи - пустина, како разорена од туѓинци.

⁸Сионската Ќерка остана како колиба во лозје, како полјачица во градина со краставици, како опсаден град.

⁹Ако не ни беше оставил Господ над Воинствата Остаток, ќе бевме како Содом, слични на Гомор.

¹⁰Чујте го Господовото слово, содомски главатари, послушај го Законот на нашиот Бог, гоморски народе!

¹¹„Зошто ми е мноштвото ваши жртви? - говори Господ. - Сит сум од овенски паленици и од мрсното на згоените телиња. И крвта Ми се згади од бикови, јагниња и јариња.

¹²Кога доаѓате да Ми го видите лицето, кој од вас бара да гази по Моите преддворја?

¹³Прекратете да Ми носите ништожни приноси, темјанот го замразив. Млади месечини, саботи и собори - не поднесувам празнувања и беззаконија.

¹⁴Вашите млади месечини и празници ги мразам од сета душа - тешки Ми се, не можам да ги поднесам!

¹⁵Кога ги ширите рацете за молитва, Јас ги одвраќам очите од вас. Само ги множите молитвите, Јас не ве слушам. Рацете ви се натопени во крв,

¹⁶измијте се, очистете се. Отстранете ги од пред Моите очи нечесните дела, престанете да правите зло!

¹⁷Учете се на добри дела: стремете се кон правдата, притекнете му на помош на угнетуваниот, помогнете му на сирачето до правдата, заземете се за вдовицата.”

¹⁸„И сега дојдете, да бидеме прави, говори Господ. Ако ви бидат гревовите како црвено сукно, ќе бидат бели како снег; ако бидат румени како пурпур, ќе станат како волна.

¹⁹Ако сакате да Ме послушате, ќе уживате во земните плодови.

²⁰Ако истраете во бунтовството, ќе ве проголта меч.” Така зборуваше Господовата уста.

²¹Како стана ти блудница, верна тврдино? Беше полна со правда, правдата престолуваше во неа, а сега - убијците.

²²Твоето сребро се претвори во троска, виното ти се разводни.

²³Твоите кнезови се одметнаа, се спријателија со крадци. Сите копнеат за поткуп, летаат по дарови. Му ја скратуваат правдата на сирачето, парницата на вдовицата не стига до нив.

²⁴Затоа вака зборува Господ, Господ над Воинствата, Израелевиот Јунак: „Ах, кога ќе се задоволам над противниците и кога ќе им се одмаздам на непријателите!

²⁵Кога ќе ја испружам раката на тебе, за да ја очистам твојата троска со киселина, за да ја отстранам од тебе секоја смеса!

²⁶Да ти поставам пак судии како некогаш, советници како во почетокот, па да те викаат Праведен Град, Тврдина на верноста.”

²⁷Праведен суд ќе го откупи Сион, а правдата неговите обратеници.

²⁸Отпадниците и грешниците ќе се скршат заедно, а ќе загинат оние, кои Го напуштаат Господа.

²⁹Да, ќе се срамите заради дабовите по кои копнеете сега, и ќе црвенеете заради градините во кои сега уживате.

³⁰Зашто, ќе бидете како даб со исушени лисја, и како градина во која нема вода.

³¹Силниот ќе биде како коноп, а искрата негово дело, заедно ќе изгорат, а никој да ги згасне.