Read Библија, Константинов Исаија 21 Bible Online

Исаија 21 - Библија, Константинов bible

Исаија 21

¹Пророштво за Приморската Пустина. Како што виорите дувајќи низ Негев доаѓаат од пустината, од стравотниот крај

²- ми се откри во страшно видение - така ограбувачот ограбува, запустувачот запустува. „Нафрли се, Еламу, опколи, Мидејо! Ќе ги докрајчам сите пискотници.”

³Затоа моите бедра се полни со грчеви; ме опфаќаат болки како болките на родилката; оглувев од збунетост, ослепев од страв.

⁴Срцето ми трепери, ужас ме опфати, примракот за кој копнеев стана страшилиште.

⁵Поставуваат стол, распростираат столна прекривка, се јаде и пие. Станете, кнезови мачкајте ги штитовите!

⁶Зашто Господ ми рече вака: „Оди, постави стражари! Нека јават, што ќе видат.

⁷Ако видат коњаници, вдвоени јавачи, јавачи на осли, јавачи на камили, нека внимаваат добро, со напрегнато внимание!”

⁸А стражарот извика: „Господару, постојано сум во стражарницата дење, јас престојувам на стража целата ноќ.”

⁹И ете, доаѓаат коњаници, двојни јавачи. Тие ми викнаа, тие рекоа: „Падна, падна, Вавилон! Сите кипови на неговите богови се искршија на земја.”

¹⁰Извршено жито, чедо на моето гумно, што чув од Господа над Воинствата, од Израелевиот Бог, ви јавив!

¹¹Пророштво за Едом. Ми викаат од Сир: „Стражару, кое доба на ноќта е? Стражару, кое доба на ноќта е?”

¹²Стражарот одговори: „Утрото доаѓа, а потоа пак ноќта. Сакате ли да прашувате, прашајте, вратете се, дојдете!”

¹³Пророштво за Арабјаните. Почивате во пустинските грмушници, дедански каравани.

¹⁴Изнесете вода пред жедните жители на Темската Земја, излезете со леб пред бегалците.

¹⁵Тие бегаат пред мечевите, пред извлечениот меч, пред оптегнатиот лак, пред жестокиот бој.

¹⁶Да, вака ми рече Господ: „Уште една година, надничарска година, и ќе ја снема сета Кидарова слава.

¹⁷А од многубројните стрелци меѓу храбрите Кидарови синови малкумина ќе останат.” Така зборуваше Господ, Израелевиот Бог.