Read Библија, Константинов Исаија 22 Bible Online

Исаија 22 - Библија, Константинов bible

Исаија 22

¹Пророштво за Долината на Видението. Што ти е да се искачуваш цел на покривите,

²граде полн со врева, бучен граде, разигран граде? Твоите истепани не паднаа од меч, ниту твоите мртви паднаа во бој;

³сите твои главатари побегнаа заедно, паднаа во ропство не оптегнувајќи лак. Заробени се сите твои кнезови, напразно избегаа далеку.

⁴Затоа велам: „Оставете ме, ќе заплачам горко; не ме утешувајте заради уништувањето на Ќерката на Мојот народ.”

⁵Зашто ова е ден на метеж и на угнетување од Господа, од Господа над Војските. Во Долината на Видението се руши ѕид, извик за помош се крева во планините.

⁶Елам го зема тулот, Арам јава коњ, а Кир го открива штитот.

⁷Твоите красни долини полни се со бојни коли, коњаниците се наредија пред вратата.

⁸Така паѓа Јудината заштита. Во оној ден го сврте погледот на оружјето во Горската Куќа.

⁹Видовте дека во Давидовиот Град има многу пукнатини. Ги собравте водите од Долниот Рибник.

¹⁰Ги преброивте ерусалимските куќи, ги разурнавте куќите за да го зацврстите ѕидот.

¹¹Меѓу двата ѕида направивте собиралиште за водата од Стариот Рибник. Но не погледнавте кон Творецот, ниту го видовте Оној Кој одамна смислил сè.

¹²Господ, Господ над Воинствата, ве повикуваше во оној ден да плачете и да жалите, да ги избричите главите и да ги препашете вреќиштата.

¹³А ете: радост и веселба, ги убиваат говедата и ги колат овците; јадат месо и пијат вино: „Да јадеме и пиеме, зашто утре ќе умреме.”

¹⁴Но Господ над Силите ми јави: „Додека не умрете, тој грев нема да ви биде простен,” рече Господ, Господ над Восјките.

¹⁵Вака зборува Господ, Господ над Воинствата: „Тргни, оди кај оној дворјанец, кај Шевна, домоуправник на дворецот,

¹⁶кој си делка гроб на високото место и си засечува живеалиште во стената: ‘Со што располагаш тука и кого го имаш тука, за да делкаш гробница за себе?

¹⁷Ете, Господ ќе те фрли далеку со еден единствен удар, ќе те фати силно,

¹⁸ќе те смота во клопче, ќе те фрли како топка во широка земја! Ти ќе умреш таму, со колата што ти беше слава, ти, сраму на дворецот на својот господар!

¹⁹Ќе те лишам од твојата служба, ќе те истерам од твоето место.

²⁰Ќе го повикам својот слуга Елијаким, Хелкиевиот син.

²¹Ќе му ја облечам твојата облека, ќе го препашам со твојот појас, ќе му ја предадам твојата власт во рацете, па ќе им биде татко на ерусалимските жители и на Јудината куќа.

²²Ќе му го ставам на плеќи клучот на Давидовиот Дом: Кога ќе отвори, никој не ќе затвори, кога ќе затвори, никој не ќе отвори.

²³Ќе го забијам како клин во цврсто место; и ќе стане престол на слава на татковиот си дом.

²⁴На него ќе биде закачувана сета слава на неговиот татковски дом, подниците и потомството, сите мали садови, од чаши до грнци.

²⁵Во оној ден - слово е на Господа над Војските - ќе го истргам клинот закачен во цврсто место, ќе се скрши и ќе падне. И сиот товар што висеше на него ќе се скрши, зашто Господ зборуваше.’”