Read Библија, Константинов Исаија 23 Bible Online

Исаија 23 - Библија, Константинов bible

Исаија 23

¹Пророштво за Тир: Ридајте, тарсиски бродови, зашто е разурната вашата тврдина! Соопштено им е додека се враќаа од Китимската Земја.

²Молкнете, жители на приморјето, сидонски трговци, чии гласници бродеа по морето по голема вода.

³Сеидба на Нил, жетва на Реката, беа негово богатство. Тој им беше пазар на народите.

⁴Срами се, Сидоне, зашто морето зборува: „Не ме фаќаат породилни болки, ниту раѓам, ниту хранам момчиња, ниту одгледувам девојки.”

⁵Египетците ќе се растреперат кога ќе ги чујат вестите за Тир.

⁶Отпловете во Тарсис, ридајте, жители на приморјето.

⁷Дали е тоа вашиот весел град, што постои од дамни времиња и што нозете го носеа далеку за да се насели таму?

⁸Кој го одлучи тоа против свечениот Тир, чии трговци беа кнезови, а прекупувачите првенци на земјата?

⁹Господ над Воинствата одлучи така, за да ја засрами горделивата слава, за да ги понижи сите прочуени на земјата.

¹⁰Обработувај ја земјата, тарсиска ќерко, го нема веќе твоето пристаниште!

¹¹Господ ја крена Својата рака на морето и ги растресе царствата. Господ заповеда да се разурнат ханаанските тврдини.

¹²Рече: „Не ќе воскликнуваш веќе, засрамена девице, сидонска ќерко!” Стани и замини во Китим; ни таму не ќе имаш мир.

¹³Еве ја Халдејската Земја. Тој народ не пстоеше; Асирецот им ја утврди земјата. Се издигаат опсадни стражарници, разурнуваат тврдини, сè е урнатина.

¹⁴”Ридајте, тарсиски бродови, разурната е вашата тврдина!”

¹⁵Ќе се случи, во оној ден, Тир да биде заборавен седумдесет години, како деновите на еден цар. А по седумдесет години на Тир ќе му биде како на блудницата од песната:

¹⁶„Земи ја харфата и скитај низ градот, заборавена блуднице! Свири убаво, пеј многу, за да те спомнат!”

¹⁷По седумдесет години Господ ќе го посети Тир. И градот ќе ја добива пак својата блудничка плата. Ќе блудствува со сите царства на лицето на земјата.

¹⁸Но неговата печалба и плата ќе Му бидат посветени на Господа; не ќе бидат вложени во сокровиште ниту ќе бидат чувани, туку неговата добивка ќе биде за оние кои престојуваат пред Господа, за да имаат храна до наситување и пристојна облека.