Read Библија, Константинов Исаија 26 Bible Online

Исаија 26 - Библија, Константинов bible

Исаија 26

¹Во оној ден, ќе ја пеам оваа песна во Јудината Земја: „Ние имаме цврст град: за одбрана Тој ни крева ѕидови и предѕидишта.

²Отворете ги вратите! Нека влезе праведниот народ, кој ја пази верноста,

³чие значење е цврсто, кој го чува мирот зашто се надева во Тебе.

⁴Надевајте се во Господа довека, зашто Господ е Вечна Стена;

⁵Тој ги соборува оние кои живееја високо, разурнува висока крепост, ја разурнува во прав, ја срамнува со земјата,

⁶па ја газат нозе, нозете на бедните и чекорите на сиромашните.”

⁷Патот на праведникот е прав, Ти ја рамниш патеката на праведниот.

⁸Да, на патеката на Твоите судови, Господи, Те чекаме желно; душата ни копнее по Твоето Име и по Твојот спомен.

⁹Со својата душа копнеам по Тебе ноќе, и со својот дух Те барам во себе, во зори. Зашто кога Твоите судови се појавуваат на земјата, жителите на земниот круг се учат на правда.

¹⁰Ако биде помилуван безбожникот тој не се учи на праведност. Во земјата на правдата тој прави беззаконие и не се обѕира на Господовото величие.

¹¹Господи, Твојата рака е подигната а тие не ја гледаат. Нека ја видат и нека се засрамат, нека ги проголта ревноста на народот, нека ги проголта огнот подготвен за Твоите непријатели.

¹²Господи, Ти ни даваш мир, зашто Ти си Творец на сите наши дела.

¹³Господи, Боже наш, господареа над нас освен Тебе, други господари, но единствено Тебе, Твоето Име, ние ќе споменуваме.

¹⁴Мртвите нема да оживеат, сенките нема да воскреснат, зашто Ти ги казни и ги уништи и го сотре секој спомен за нив!

¹⁵Го умножи народот, Господи, го умножи народот, Се прослави, ги прошири сите граници на земјата!

¹⁶Господи, Те бараа во неволја; излеваа тивка молитва, кога ги стигна Твојата казна.

¹⁷Како што трудната жена пред породувањето се грчи и вика во болки, такви сме, Господи, пред Тебе.

¹⁸Забременивме, во маки сме како да раѓаме ветер, не и донесовме дух на спасение на земјата, ниту паднаа жителите на светот.

¹⁹Твоите мртви ќе оживеат, телата ќе воскреснат. Разбудете се и воскликнувајте, жители на правот! Зашто Твојата роса е - роса на светлината, и земјата ќе ги исфрли мртвите.

²⁰Ајде, народе Мој, влези во собите и затвори ги вратите зад себе. Скриј се за миг додека не помине гневот.

²¹Зашто, ете, Господ ќе излезе, од Своето Живеалиште, за да ги казни земните жители дека згрешија кон Него. Земјата ќе ја исфрли сета крв што е пролеана на неа и не ќе ги крие веќе оние кои беа убиени на неа.