Read Библија, Константинов Исаија 3 Bible Online

Исаија 3 - Библија, Константинов bible

Исаија 3

¹Ете, Господ, Господ над Воинствата, им ги одзема на Ерусалим и Јудеја секоја поткрепа, помош во леб и помош во вода,

²јунакот и војникот, судијата и пророкот, вражалецот и старешината, педесетникот и чесниот,

³советникот и мудриот уметник и оној што се занимава со баење.

⁴„А за главатари им поставувам деца, им давам на дечињата да владеат над нив.”

⁵Луѓето ќе бидат угнетувани, човек од човек и секој од својот ближен; детето ќе се големее над старецот, простиот над чесниот,

⁶па секој ќе го фаќа брата си во татковата куќа: „Ти имаш облека, биди ни главатар, и тие урнатини нека бидат под твоја рака!”

⁷А тој ќе се брани, во оној ден: „Не сакам да бидам водач, нема кај мене ни леб ни облекло: не ме поставајте за кнез на народот.”

⁸Ерусалим се разурна и Јудеја падна зашто нивниот јазик и нивните дела Му се противат на Господа, па му се бунтуваа на погледот на Неговата Слава.

⁹Нивното лице сведочи против нив, го разгласуваат својот грев како Содом и не го кријат, тешко им ним, сами си спремаат пропаст.

¹⁰Кажете: „Блазе му на праведникот, ќе се храни со плодот на своите дела!

¹¹Тешко му на нечесниот, ќе му биде зло, на него ќе паднат делата на неговите раце.

¹²Дете го угнетува Мојот народ, и жените владеат со него. О народе мој, твоите владетели те заведуваат и го раскопуваат патот по кој одиш.”

¹³Господ стана да се суди со Својот народ,

¹⁴Господ доаѓа на суд со старешините и главатарите на Својот народ: „Го опустивте Моето лозје, во вашите куќи е што му одзедовте на сиромавиот.

¹⁵Со кое право го угнетувате Мојот народ и го газите лицето на бедниот?” - Зборува Господ, Господ над Војските.

¹⁶И Господ рече: „Зошто се гордеат сионските ќерки па одат со испружени вратови, намигнуваат наоколу со окото, чекорат со ситни чекори, ѕвецкаат со гривните на нозете?

¹⁷Ќе го оќелави Господ темето на сионските ќерки, ќе ја открие Господ нивната голота.”

¹⁸Во оној ден Господ ќе одземе сè со што се гордее таа: веришките на нозете, мрежите за коса и месечинките,

¹⁹наушниците, нараквиците и превезите, главоврските, појасите, малите садови со мириси и приврските,

²⁰прстените и обетките за носот,

²¹скапоцените облеки и плаштениците, приврските и торбичките,

²²огледалата и кошулчињата, преврските за глава и наметките.

²³Место благомириси, смрдеж; место појаси, јаже; место кадрави коси, ќелавост; место раскошна облека, вреќиште; место убавина, гнилеж.

²⁴Твоите мажи ќе паднат од меч, твоите јунаци во војна.

²⁵Твојата врата ќе кука и ќе тажи, ќе седиш напуштена на земјата.