Read Библија, Константинов Исаија 32 Bible Online

Исаија 32 - Библија, Константинов bible

Исаија 32

¹Еве со правда царот царува, кнезовите владеат со правина;

²секој е како заветрина, прибежиште од невреме, како потоци во сува земја, како сенка во жедна пустина.

³Очите на видовитите не ќе бидат веќе слепи, ушите на оние кои слушаат ќе слушаат внимателно;

⁴срцето на неразумните ќе ја сфаќа мудроста, тепкавите ќе зборуваат брзо и јасно;

⁵расипаните веќе не ќе ги викаат благородни;

⁶зашто, расипаникот зборува лудости, и неговото срце смислува беззаконие за да направи злодела, за да зборува горделиво за Господа, за да му го остави празен желудникот на гладниот, за да му го скрати пиењето на жедниот.

⁷Кај измамникот оружјето е пакосно, тој смислува само сплетки, за да го упропасти бедниот со лаги, па и кога сиромавиот докажува право.

⁸На благородниот замислите се благородни и тој стои цврсто во сè што е чесно.

⁹Станете, небрежни жени, слушајте го мојот глас; лесноумни ќерки, чујте ја мојата беседа.

¹⁰За една година и неколку дена ќе треперите, лесноумници, зашто ќе нема гроздобер, не ќе се берат плодови.

¹¹Треперете, вие безгрижни, смутете се, лесноумни, соблечете се, разголете се, опашете вреќиште околу бедрата!

¹²Удирајте се по градите заради прекрасните полиња, заради плодните лозја;

¹³заради нивите на Мојот народ, што раѓаат трња и трништа; заради сите весели куќи, на разиграниот град.

¹⁴Зашто, дворецот ќе биде напуштен, ќе запустее бучниот град; тврдината и стражарницата ќе станат пештера довека - ќе им бидат радост на дивите ослици, пасиште на стадата,

¹⁵додека не се излее врз вас Духот од висините. Тогаш пустината ќе стане овошник, а овошната градина ќе се претвори во гора.

¹⁶Правото ќе се настани во пустината, а правдата ќе престојува во плодоносното поле.

¹⁷Делото на правдата ќе биде мирот, а плодот на праведноста, покој и надеж засекогаш.

¹⁸Мојот народ ќе живее во мирни населби, во безгрижни одморалишта.

¹⁹И снежен град ќе падне на шумите, градот ќе биде снижен во долините.

²⁰Блазе ви вам: кои сеете покрај сите води, пуштајќи ги волот и ослето да одат слободно.