Read Библија, Константинов Исаија 33 Bible Online

Исаија 33 - Библија, Константинов bible

Исаија 33

¹Тешко ти тебе кој незапустен, запустуваш, кој неограбен, ограбуваш, кога ќе прекратиш, тебе ќе те запустат кога ќе прекратиш да пљачкаш ќе те ограбат.

²Господи, смилувај ни се, во Тебе се надеваме! Биди наша помош секое утро, наше спасение во секоја неволја.

³Народите избегаа од силниот татнеж, Ти се дигна, племињата се распрснаа,

⁴и се собира плен како што се собираат гасениците, ќе се нафрлат врз него како јато скакулци.

⁵Господ е возвишен зашто престолува во висината, Тој го исполнува Сион со правосудство и со правда.

⁶Надежен е твојот век: Мудроста и знаењето се спасоносно благо, а Господовиот страв негово богатство.

⁷Ете, жителите на Ариел, викаат по улиците, гласници мироносци плачат горчливо.

⁸Патеките запустеа, ги снема патниците од патиштата; сојузите се раскинуваат, ги презираат сведоците, нема обѕир кон никого.

⁹Земјата гине во жалост, Ливан венее во срам. Сарон е како пустина, Васон и Кармел оголеа.

¹⁰„Сега ќе станам - вели Господ - сега ќе се кренам, сега ќе се возвишам.

¹¹Зачнавте сено, ќе родите слама здивот ваш е како оган, ќе ве голтне.

¹²Народите ќе бидат изгорени во вар, како отсечени трња, што горат во оган.

¹³Чујте, вие кои сте далеку, што направив, а вие кои сте близу познајте Ми ја силата!”

¹⁴Грешниците треперат на Сион, трепет ги обзеде безбожниците: „Кој ќе опстане од нас пред уништувачкиот оган, кој ќе опстане од нас пред вечниот пламен?”

¹⁵Оној кој оди во правда и кој зборува право, кој ја презира печалбата од насилство, кој ги тресе рацете за да не прими поткуп, кој ги затнува ушите за да не чуе за крвопролевањата, кој ги затвора очите за да не види зло -

¹⁶тој ќе живее во висините, тврдини врз карпи ќе му бидат прибежишта, ќе има доста леб и водите не ќе му недостасуваат.

¹⁷Твоите очи ќе го гледаат царот во неговата убавина, ќе ја разгледуваат непрегледната земја.

¹⁸Твоето срце ќе мисли во страв: „Каде е оној што броеше, каде е оној што мереше, каде е оној што ги пребројуваше стражарниците?”

¹⁹Не ќе видиш веќе свиреп народ, народ со неразбирлив и со несфатлив говор, туѓ јазик што никој не го разбира.

²⁰Погледај на Сион, на градот на нашите празници: твоите очи ќе го видат Ерусалим, заштитено престојувалиште, шатор што не се пренесува, чии колчиња никогаш не се вадат, и ниту едно јаже не му се кине.

²¹Таму ни е силниот Господ; место на широки реки и потоци; не ќе помине оттаму ниеден брод ни весла, ниту некој воен брод ќе проедри.

²²Зашто Господ е наш Судија, Господ е наш Законодавец, Господ е наш Цар - Тој ќе нè спаси.

²³Јажињата ти попуштија, не можат да го држат јарболот ниту да ги развијат едрата.

²⁴И ниеден жител нема да рече: „Болен сум!” На народот што живее таму, ќе му се прости беззаконието.