Read Библија, Константинов Исаија 38 Bible Online

Исаија 38 - Библија, Константинов bible

Исаија 38

¹Во она време Езекија смртно се разболе. Пророкот Исаија, синот Амосов, му дојде и му рече: „Вака вели Господ: ‘Среди ја својата куќа, зашто ќе умреш, не ќе оздравиш.’”

²Езекија се сврте кон ѕидот и вака Му се помоли на Господа:

³„Ах Господи, спомни си дека пред Тебе одев верно и со чесно срце, и дека го направив тоа што е добро во Твоите очи.” И Езекија почна да плаче горко.

⁴Тогаш Му дојде Господовото слово на Исаија:

⁵„Отиди и речи му на Езекија: ‘Вака вели Господ, Бог на твојот татко Давид: „Ја послушав твојата молитва, ги видов твоите солзи. Ќе те излечам; по три дни ќе влезеш во Господовиот Дом. Ќе му додадам на твојот век петнаесет години.

⁶Ќе ве избавам и тебе и овој град од рацете на асирскиот цар. Да, ќе го заштитам овој град!”‘

⁷Исаија одговори: „Еве ти знак од Господа дека ќе направи како што рече:

⁸сенката што слегла по степените на Ахазовиот сончаник ќе ја вратам за десет степени назад.” И сонцето се врати за десет степени назад од степените по кои веќе беше слегло.

⁹Песна на Езекија, јудејски цар, кога се разболе па оздраве од својата болест:

¹⁰Говорев: „На пладне на своите денови јас треба да заминам. При вратите на Подземјето ми е одредено место за остатокот на моите денови.”

¹¹Зборував: „Не ќе Го видам веќе Господа во земјата на живите, не ќе видам веќе никого од жителите на овој свет.

¹²Моето живеалиште е изместено, фрлено е далеку, како пастирски шатор; како ткајач го намота мојот живот за да ме скинеш од основата. Од утрото до ноќта ќе ме докрајчиш,

¹³викам сè до утрото; како лав Тој ги крши моите коски, од утрото до мракот ќе ме докрајчиш.

¹⁴Како ластовичка јас цивкам, барам помош како гулабица, моите очи гледаа кон небото, Господи, во неволја сум, спаси ме.

¹⁵Како ќе Му зборувам и што ќе Му речам? Па Тој е кој дејствува. Ќе одам смирено во текот на сите мои години, иако со горчина во душата.

¹⁶Господи, моето срце ќе живее за Тебе и ќе живее мојот дух. Ти ќе ме излечиш и ќе ми го вратиш животот,

¹⁷болеста ќе ми се претвори во здравје. Ти ја спаси мојата душа од јамата на уништувањето, сите мои гревови ги фрли зад плеќи.

¹⁸Зашто Подземјето не Те слави, смртта не Те фали; оние кои ќе паднат во ровот, не се надеваат повеќе во Твојата верност.

¹⁹Живиот, живиот, единствено тој Те слави, како јас денес. Таткото ќе ги поучува синовите во Твојата верност.

²⁰Господи, спаси ме, и ние ќе пееме со харфите, во сите денови на својот живот, во Господовиот Дом.

²¹Исаија наложи: „Донесете облог од смокви, преврзете го на неговиот чир, и тој ќе оздрави.”

²²Езекија праша: „По кој знак ќе препознам дека ќе влезам во Господовиот Дом?”