Read Библија, Константинов Исаија 40 Bible Online

Исаија 40 - Библија, Константинов bible

Исаија 40

¹„Тешете го, тешете го, Мојот народ,” говори вашиот Бог.

²„Зборувајте му на срцето на Ерусалим, викајте му, за да му сврши ропството, за да му биде простена вината, зашто од Господовата рака прими двојно за сите свои гревови.”

³Глас вика: „Пригответе Му на Господа пат низ пустината. Израмнете ја патеката на нашиот Бог во степата.

⁴Нека се издигне секоја долина, нека се спушти секоја гора и бреже. Што е нерамно, нека се израмни, стрмнините нека станат рамни.

⁵Тогаш ќе се открие Славата Господова, и секое тело ќе ја види, зашто Господовата уста зборуваше.”

⁶Гласот наложува: „Викај!” Одговорив: „Што да викам?” - „Секое тело е како трева, неговата сета убавина е како полски цвет.

⁷Тревата се суши, цветот свенува, кога Господовиот здив ќе помине преку нив. Навистина, народот е трева.

⁸Тревата се суши, цветот овенува, но Словото на нашиот Бог останува довека.”

⁹Искачи се на висока гора, гласнику на Добрата вест, Сионе! Поткрени го силно својот глас, гласнику на Добрата вест, Ерусалиме! Издигни го, не бој се, речи им на јудејските градови: „Еве Го вашиот Бог!”

¹⁰Ете, Господ Бог доаѓа со сила, владее со Својата мишка! Еве ја со Него и Неговата плата, а пред Него Неговата награда.

¹¹Како пастир го пасе Своето стадо, во рацете ги зема јагнињата, ги носи во Својата прегратка, и внимателно ги негува доилките.

¹²Кој го измери морето со дланка и кој ги премери небесата со педа? Кој ја измерил со мерка земјата, и планините на мерилки, а бреговите на тежилка?

¹³Кој го измерил Господовиот Дух, и кој Му бил советник за да Го поучи?

¹⁴Со кој се посоветува Тој, кој Му дал разум Нему, кој Го научил на патиштата на правдата? Кој Го научи на знаење, кој Му покажа пат кон мудроста?

¹⁵Ете, народите се како капка од ведро, вредат колку прав на мерилката. Островите, ете, треперат во воздухот како ситно делче!

¹⁶Ливан е мал за огнена клада, а неговите ѕверови нема достатно за паленица.

¹⁷Сите народи се како ништо пред Него, за Него се ништо и празнина.

¹⁸Со кого ќе Го уподобите Бога? И со каков лик ќе Го споредите?

¹⁹Леачот лее кип, златарот го позлатува и одлева веришки од сребро.

²⁰Бедниот за принос бира дрво што не гние и бара вешт уметник за да му направи неподвижен кип.

²¹Зар не знаете? Зар не сте чуле? Не ли ви е откриено од старини? Зар не сфативте кој ја основа земјата?

²²Тој престолува над земниот круг, жителите се како скакулците пред Него. Како завеса ги простре небесата, ги оптегна како шатор за живеење.

²³Тој ги обрнува кнезовите во ништо, ги уништува земните судови.

²⁴Што туку беа засадени, што туку беа посеани, што туку нивното стебленце испружи корен во земјата, Тој дувнува на нив, и тие се осушуваат, виорот ги разнесува како плева.

²⁵„Со кого ќе Ме изедначите Мене, кој Ми е рамен?” вели Светецот.

²⁶Подигнете ги очите и гледајте: кој го создаде тоа? Оној Кој по број ја изведува нивната војска, и Кој ги вика сите по име.

²⁷Зошто велиш, Јакове, и ти, Израеле, зборуваш: „Мојот пат е скриен за Бога, мојата правда Му избегнува на мојот Бог?”

²⁸Зар не знаеш? Зар не си чул? Господ е вечен Бог, Творец на земните краишта. Тој не се заморува, не постанува, и Неговиот ум е неизмерлив.

²⁹На заморениот му ја враќа силата, го зајакнува немоќниот.

³⁰Младите се заморуваат и се истоштуваат, изнемоштените момчиња се тетерават.

³¹Но на оние кои се надеваат во Господа, силата се обновува, им растат крилја како на орлите, трчаат и не постануваат, одат и не се уморуваат.