Read Библија, Константинов Исаија 52 Bible Online

Исаија 52 - Библија, Константинов bible

Исаија 52

¹Разбуди се, Разбуди се! Облечи се со сила, Сионе; облечи се во најсјајни алишта, Ерусалиме, свети граде, зашто веќе не ќе се искачуваат кон тебе необрезаните и нечистите.

²Истреси го правот од себе, стани, заробен Ерусалиме! Симни го оковот од својот врат, заробена Сионска Ќерко.

³Да, вака зборува Господ: „Бевте продадени за ништо и ќе бидете откупени без сребреници.”

⁴Да, вака зборува Господ: „Мојот народ слезе некогаш во Египет за да се насели таму како странец, потоа Асирците го угнетуваа без причина.

⁵Но сега, зошто Сум Јас тука - слово е Господово - кога Мојот народ беше поробен без причина, а неговите господари ликуваат - слово е Господово - и непрекратно секојдневно се хули Моето име.

⁶Затоа мојот народ ќе го запознае Моето име, и ќе сфати, во оној ден, дека Сум Јас Кој говорам: ‘Еве Ме!’”

⁷Колку се прекрасни по планините нозете на гласоносецот на радоста кој разгласува мир, носи среќа и проповеда спасение, говорејќи му на Сион: „Твојот Бог царува!”

⁸Чуј, твоите стражари го издигаат гласот, сите заедно воскликнуваат од радост, зашто гледаат со своите очи како Господ се враќа на Сион.

⁹Ликувајте, воскликнувајте, ерусалимски урнатини, зашто Господ го утеши Својот народ и го искупи Ерусалим.

¹⁰Господ ја оголи Својата света мишка пред очите на сите народи, за да го видат сите краишта на земјата Спасението на нашиот Бог.

¹¹Одете си, одете си, излезете оттаму, не допирајте ништо нечисто! Одете си од неговата средина! Очистете се, вие кои ги носите Господовите садови.

¹²Зашто нема да излезете набрзина, ниту ќе одите бегајќи, зашто Господ ќе ви биде претходница, а Израелевиот Бог задна стража!

¹³Ете, Мојот Слуга ќе успее, ќе се издигне, ќе се возвиши и ќе се прослави

¹⁴Како што мнозина испаднаа во ужас кога го видоа, толку му беше лицето нечовечки, обезличено, па со Својот лик веќе не личеше на човек. -

¹⁵И така Тој ќе восхити многу народи и царевите ќе стиснат уста пред Него, гледајќи го она за кое што никој не им зборувал, сфаќајќи го она за што никогаш не чуле: