Read Библија, Константинов Левит (3 Moj.) 11 Bible Online

Левит (3 Moj.) 11 - Библија, Константинов bible

Левит (3 Moj.) 11

²„Кажете им на Израелевите синови вака: ‘Еве ги животните што од сите четвороношци можете да ги јадете:

³секое што има копита, но раздвоени копита и што прежива, можете да го јадете.

⁴Но овие, иако преживаат или имаат копита, не смеете да ги јадете: камилата, зашто иако прежива, нема раздвоени копита - нечиста е за вас;

⁵и зајакот, зашто иако прежива, нема раздвоени копита - нечист е за вас;

⁶дивиот зајак, иако прежива, нема раздвоени копита - нечист е за вас.

⁷А свињата, иако има копита, не прежива - нечиста е за вас.

⁸Не јадете го нивното месо, ниту да се допирате до нивната мрша - тие се нечисти за вас.’

⁹‘А од сите водни животни можете да ги јадете овие: сè што живее во водата, било во морињата, било во реките, а има перки и лушпи, можете да јадете.

¹⁰А што нема перки и лушпи во морињата и реките - од сè што плива во водата и од сè што живее во водата - се нечисти за вас.

¹¹Тие нека се нечисти за вас; не јадете го нивното месо и гнасете се од нивните трупови.

¹²И така, сè што е во водата а нема перки и лушпи нека е одвратно за вас.’

¹³‘Од птиците нека ви се одвратни овие и нека не бидат јадени - одвратни се: орелот, орелот стрвник и јастребот;

¹⁴тетребот и соколот од кој и да е вид;

¹⁵гавранот од кој и да е вид;

¹⁶нојот, јастребот кокошкар и галебот; ластовичката од сите видови;

¹⁷бувот, нуркачот, утот;

¹⁸лебедот, неситот и свраката;

¹⁹штркот, чапјата од секој вид; пупунецот и лилјакот.’

²⁰‘Сите крилести бубачки што одат на четири нозе нека ви се нечисти!

²¹Од сите тие крилести бубачки што одат на четири нозе, можете да ги јадете само оние што имаат на своите ножиња листови за да скокаат по земјата.

²²Од нив можете да ги јадете: секој вид на скакулците, салемот, арголата и зелените скакулци.

²³А сите други крилести бубачки нека ви се одвратни!’

²⁴‘И од нив ќе станете нечисти: кој и да се допре до нивната пцовисаница нека биде нечист до вечерта;

²⁵секој што ќе понесе пцовисаница од нив, нека ја испере својата облека и ќе биде сметан за нечист до вечерта;

²⁶и животните со нераздвоени копита што не преживаат се нечисти за вас, и секој што ќе се допре до нивната мрша, нека биде нечист!

²⁷Сите четвороножни животни, што одат на шепи, нечисти се за вас. Секој што ќе се допре до нивната мрша, нека биде нечист до вечерта.

²⁸А оној што ќе ја понесе нивната мрша, нека ја испере својата облека и нека биде нечист до вечерта. Тие се нечисти за вас.’

²⁹‘Од животните што лазат по земјата нека се нечисти за вас овие: невестулката, глушецот и секој вид гуштери;

³⁰ежот, камелеонот, дождовникот, зелениот гуштер и кртицата.

³¹Тие животни, од сите што ползат, се нечисти за вас. Секој што ќе ги допре мртви, нека биде нечист до вечерта.

³²А врз она на што некое од нив ќе падне мртво, нека биде нечисто: било некаков дрвен предмет или облека, или кожа или мев и секоја работа што се употребува. Секој таков предмет нека се накваси во вода и нека остане нечист до вечерта. Тогаш ќе стане чист.

³³Ако падне некое од нив во некаков земјан сад, скрши го; сè е нечисто во него.

³⁴А ако капне вода од таков сад на некаква храна, што се јаде, ќе биде нечиста.

³⁵А сè врз кое ќе падне нешто од нивниот труп, нека биде нечисто; ако тоа биде печка или огниште, нека бидат разурнати: нечисти се за вас и нека бидат нечисти за вас.

³⁶А изворот или водособиралиштето што држи вода нека бидат сметани за чисти. Но кој ќе допре мрша на животно, нека е нечист.

³⁷И ако нешто од нивната мрша падне на житно семе што ќе биде посеано, тоа останува чисто;

³⁸но ако семето се накваси со вода, а тогаш падне на него нешто од нивната пцовисаница, нека е нечисто за вас.’

³⁹‘Ако пцовиса некое животно што ви служи за храна, оној што ќе се допре до неговата мрша нека биде нечист до вечерта,

⁴⁰а секој што ќе касне од неговата пцовисаница, нека ја испере својата облека и нека биде нечист до вечерта; а кој ќе го понесе неговиот труп, нека ја испере својата облека и нека биде нечист до вечерта.’

⁴¹‘Секое животно, што ползи по земјата, е нечисто за вас; нека не се јаде.

⁴²Ништо што ползи по мевот, ништо што оди на четири нозе или на повеќе нозе - никаков ползач што лази по земјата, не јадете, зашто се одвратни.

⁴³Немојте да се онечистите сами себеси со сите тие лазачи што ползат; не осквернувајте се со нив, за да не станете и вие нечисти заради нив.

⁴⁴Зашто Јас Господ Сум ваш Бог: осветувајте се да бидете свети, зашто Јас Сум свет! Не валкајте ги вашите души ниту со едно животно што ползи по земјата!

⁴⁵Да, Јас Сум Господ; ве изведов од Египетската Земја за да ви бидам Бог. И така бидете свети, зашто Јас Сум свет!’

⁴⁶‘Тоа е закон за добитокот, за птиците и за сите животни, што живеат во водата, и за сите животни што лазат по земјата,

⁴⁷за да го разликувате нечистото од чистото; и животните, што можат да се јадат, од животните што не смеат да се јадат.’”