Read Библија, Константинов Левит (3 Moj.) 22 Bible Online

Левит (3 Moj.) 22 - Библија, Константинов bible

Левит (3 Moj.) 22

¹Господ му рече на Мојсеја:

²„Речи им на Арона и на неговите синови да постапуваат внимателно со светините на Израелевите синови и да не го обесчестуваат Моето свето име во тоа, што тие Ми ги посветуваат Мене. Јас Сум Господ!

³Кажи им: ‘Ако некогаш некој од вашите поколенија пристапи, во состојба на нечистота, кон светите приноси, што Израелците Му ги посветуваат на Господа, тој ќе биде истребен од пред Моето лице. Јас Сум Господ.

⁴Никој од Ароновите потомци, кој ќе биде лепрозен или ќе има излив, нека не јаде од светите приноси додека не се очисти. Оној кој ќе се допре до што и да е нечисто од мртво тело или оној од кого ќе излезе семеизлив;

⁵оној кој ќе се допре до некаков лазач што го прави нечист; или до човек, од кого може да стане нечист, со каква и да е нечистота;

⁶оној кој ќе се допре до нешто такво нека биде нечист до вечерта и нека не јаде од светите приноси додека не го измие своето тело во вода.

⁷Штом сонцето ќе зајде, очистен е. Тогаш може да јаде од светите приноси, зашто тоа му е храна.

⁸Нека не јаде ни мрша ни раскинато од ѕверови, за да не се онечисти со тоа. Јас Сум Господ.

⁹Нека ги пазат Моите повелби, за да не навлечат вина врз себеси и, онечистувајќи се со неа, за да не загинат заради неа. Јас, Господ, ги осветувам нив.’

¹⁰‘Ниеден туѓинец да не јаде од светината; ни свештениковиот гостин, ни наемникот, не смеат да јадат од светиот принос.

¹¹Ако свештеникот купи некого за сребро, тој може да јаде како и оној, кој се родил во неговиот дом; тие можат да јадат од неговиот леб.

¹²Ако свештеникова ќерка се омажи за туѓинец, не смее да јаде од воздигнатите свети приноси.

¹³Но ако свештениковата ќерка стане вдовица или биде оставена, а нема деца, па се врати во татковата куќа, може да се храни со лебот на татка си, како во својата младост. Ниеден туѓинец не смее да јаде од него.

¹⁴Ако некој јаде свет принос од незнаење, нека му го надомести на свештеникот, додавајќи петина.

¹⁵Нека не ги сметаат за безвредни светите приноси што Израелците Му ги принесуваат на Господа.

¹⁶И јадејќи ги светините, би навлекле врз себе, вина за престап, зашто Јас, Господ, ги осветувам.’”

¹⁷Господ му рече на Мојсеја:

¹⁸„Зборувај им на Арона, на неговите синови и на сите Израелци и речи им: ‘Секој човек од Израелевиот дом или странец во Израел кој донесува свој принос - како завет или како доброволен дар, за да се принесе на Господа како паленица - за да биде примен,

¹⁹треба да биде принесено машко, без недостаток, било да е говедо, овца или коза.

²⁰Не принесувајте ништо со недостаток на него, зашто тоа нема да ви биде примено.

²¹Ако некој му принесува на Господа помирителна жртва за да изврши некаков завет или за да направи доброволен принос, било од крупниот или од ситниот добиток, животното - за да биде примено - треба да биде без недостаток; никаков недостаток не смее да има на него.

²²Никакво слепо или хромо, или со изместено, гушаво, со оток или со јадеж животно; такво не Му принесувајте на Господа, ниту такво положувајте врз жртвеникот како паленица на Господа.

²³Јунец или овца со подолг или покус член можеш да принесеш како доброволен принос, но ако е жртва заветница нема да биде примена.

²⁴Не принесувајте Му на Господа животно свиткано, со слаби дробови, скршено или скопено. Не правете го тоа во вашата земја,

²⁵ниту примајте такво од странец за да го принесете во дар на вашиот Бог. Со недостаток се, зашто се повредени. Затоа нема да ви биде примено.’”

²⁶Господ му рече на Мојсеја:

²⁷„Кога ќе се роди теле, или јагне, или јаре, седум дена нека остане покрај својата мајка. Од осмиот ден може да биде примено како паленица на Господа.

²⁸Не колете крава, ни овца, во ист ден со нејзиното младо.

²⁹Кога ќе Му принесувате на Господа жртва благодарствена, принесете ја така за да биде примена.

³⁰Нека биде изедена во истиот ден; не оставајте од неа за наутро. Јас Сум Господ!”

³¹„Пазете ги Моите заповеди и исполнувајте ги. Јас Сум Господ!

³²Не обесчестувајте го Моето свето име, за да бидам свет среде Израелевите синови. Јас Сум Господ, Кој ве осветувам.

³³Јас, Кој ве избавив од Египетската Земја за да бидам ваш Бог, Јас Господ.”