Read Библија, Константинов Еремија 30 Bible Online

Еремија 30 - Библија, Константинов bible

Еремија 30

¹Слово што Господ му го упати на Еремија:

²„Вака зборува Господ, Израелевиот Бог: ‘Запиши ги во книжен свиток сите овие зборови што ти ги зборувам.

³Зашто еве доаѓаат денови - зборува Господ - и ќе ја изменам судбината на Својот народ во Израел, во Јудеја - зборува Господ - и ќе ги вратам во земјата што им ја дадов во наследство на нивните татковци.’”

⁴Еве ги зборовите што Господ ги рече за Израел и за Јудеја:

⁵„Господ зборува вака: ‘Слушам крик на ужас, тоа е стравотија, а не мир.

⁶Ајде, распрашајте се и погледајте: дали некогаш родил маж? А сите мажи се фаќаат за бедрата како родилки! Зошто се сите лица изобличени и побледени?

⁷Леле, зашто е голем овој ден, сличен нему не бил! Време на неволја е за Јакова, но ќе се избави од неа.

⁸Во оној ден - говори Господ над Воинствата - ќе го скршам јаремот на нивниот врат и ќе ги скинам нивните вериги. Веќе не ќе му служат на туѓинец,

⁹туку ќе Му служат на Господа, својот Бог, и на Давида, својот цар, кого ќе им го подигнам.

¹⁰Не бој се, Јакове, слуго Мој - зборува Господ, не плаши се, Израелу! Зашто еве, ќе те спасам од далеку, и твоето потомство од земјата на заточението. Јаков ќе се смири пак, ќе живее спокојно, и никој не ќе го плаши - зборува Господ,

¹¹зашто Јас Сум со тебе - говори Господ - за да те избавам. Ќе ги сотрам народите меѓу кои што те протерав, а тебе нема да те уништам сосем; но ќе те казнам по правда, не смеам да те пуштам неказнет.’

¹²Зашто, Господ зборува вака: ‘Твојата рана е неисцелива, твојата болка - непреболена.

¹³Нема лек за твојата рана, и никако да зарасти.

¹⁴Сите љубовници те заборавија, веќе и не прашуваат за тебе! Зашто Јас удрив на тебе, како што удира непријателот, со жестока казна за беззаконие и за многуте твои гревови.

¹⁵Зошто лелекаш заради својата рана? Зар е неизлечива твојата болка? Заради мноштвото беззаконија и заради многуте твои гревови ти го сторив тоа.

¹⁶Но и тие што те јадат ќе бидат изедени, сите твои непријатели ќе отидат во ропство; твоите ограбувачи ќе бидат ограбени, и кои што те пљачкосуваа ќе бидат пљачкосани.

¹⁷Но Јас ќе те исцелам, ќе ти ги залечам раните - зборува Господ. Те викаа „Истераната” и „Сионка, за која никој не прашува.”‘

¹⁸Господ зборува вака: ‘Еве, ќе ја изменам судбината на Јакововите шатори, ќе им се смилам на неговите шатори: врз неговите урнатини пак ќе биде соѕидан град, и дворците ќе стојат на старото место.

¹⁹Од нив ќе се чујат благодарници и радосни гласови. Ќе ги умножам, и веќе не ќе ги намалувам со број, ќе им дадам углед, и веќе не ќе ги презираат.

²⁰Нивните синови ќе ми бидат како некогаш, нивната заедница ќе стои цврсто пред Мене, а ќе ги казнам сите нивни угнетувачи.

²¹Нивниот главатар ќе никне од нив, нивниот владетел ќе излезе пред нив. Ќе го пуштам кон Себе, за да Ми се приближи, зашто кој ќе се осмели сам да излезе пред Мене! - говори Господ.

²²И вие ќе бидете Мој народ, а Јас ваш Бог.’”

²³Ете, Господово невреме, јароста навлегува, силен виор се размавтува, и паѓа врз безбожничките глави.

²⁴Господовиот гнев нема да стивне додека тој не ги изврши и не ги исполни замислите на Своето срце. Во последните денови ќе го разберете тоа јасно.