Read Библија, Константинов Еремија 35 Bible Online

Еремија 35 - Библија, Константинов bible

Еремија 35

¹Господ му упати слово на Еремија во деновите на Јоаким, синот Јосиин, јудејскиот цар:

²„Оди во заедницата на Рихавовците, зборувај со нив и доведи ги во Господовиот Дом, во една од двораните, и дај им вино.”

³Тогаш ги доведов Јазаниј, синот Ховасиин синот Еремиин, неговите браќа и сите негови синови и сиот дом на Рихавовците,

⁴и ги доведов во Господовиот Дом, во двораната на Божјиот човек Бен Анан, синот Идалиин, што е до кнежевската дворана, а над двораната на вратарот Масиј, синот Салумов.

⁵Потоа ставив пред синовите на домот на Рихавовците врчви полни со вино и чаши, та им реков: „Пијте вино!”

⁶Ама тие одговорија: „Не пиеме вино,” зашто нашиот татко Јонадав, синот Рихавов, ни заповеда: ‘Не смеете никогаш да пиете вино, ни вие ни вашите синови.

⁷Ниту смеете да градите куќи, ниту да сеете семе, ниту да садите лозја, ниту да ги имате во сопственост, туку поминувајте го сиот ваш живот под шатори, за да живеете долго во земјата каде престојувате како странци.’

⁸И ние го послушавме гласот на нашиот татко Јонадав, синот Рихавов, во сè што ни заповеда: да не пиеме никогаш вино, ни ние ни нашите жени, ниту нашите синови, ниту нашите ќерки,

⁹да не градиме куќи, ни да имаме лозја ни засеани полиња,

¹⁰да живееме под шатори и послушно пазиме сè што ни заповедал нашиот татко Јонадав.

¹¹Само кога Навуходоносор, вавилонскиот цар, тргна против оваа земја, рековме: ‘Ајде, да појдеме во Ерусалим за да ја избегнеме халдејската војска и арамејската војска!’ И така сега живееме во Ерусалим.”

¹²Тогаш му дојде Господово слово на Еремија:

¹³„Вака зборува Господ над Војските, Израелевиот Бог: ‘Оди и објави им на Јудејците и на Ерусалимците: „Зар нема да ја примите Мојата наука и нема да ги послушате Моите зборови? - говори Господ -

¹⁴Се исполнуваат зборовите на Јонадав, синот Рихавов, кој што им забрани на своите синови да пијат вино, и до денешниот ден никој не го пие, зашто тие ги слушаат зборовите на својот татко. А Јас ви зборував исто, ама не Ме слушавте.

¹⁵И ги праќав постојано кај вас Своите слуги, пророците, за да ви проповедаат: ‘Вратете се секој од својот лош пат, поправете ги вашите дела и не трчајте по туѓите богови за да им служите, па ќе останете во земјата што ви ја дадов вам и на вашите татковци.’ Ама не го приклонивте своето уво и не Ме послушавте.

¹⁶Синовите на Јонадав, синот Рихавов, ги пазеа заповедите што им ги даде нивниот татко. Но Мене овој народ не Ме слуша.”‘

¹⁷Затоа зборува Господ, Господ над Војските, Израелевиот Бог: ‘Еве, ќе ги навлечам врз Јуда и врз сите Ерусалимци сите оние неволји со кои им се заканив, зашто им зборував, а тие не Ме слушаа, ги повикував, но тие не се одѕвиваа.’”

¹⁸Еремија и рече на заедницата на Рихавовците: „Вака зборува Господ над Воинствата, Израелевиот Бог: ‘Зашто ги слушавте заповедите на својот татко Јонадав и ги пазевте сите наредби и правевте сè што тој ви заповедал,

¹⁹затоа - вака зборува Господ над Војските, Израелевиот Бог - на Јонадав, синот Рихавов, никогаш не ќе му снема потомци, кои што ќе стојат пред Моето лице во сите денови.”‘“