Read Библија, Константинов П.Еремиин 5 Bible Online

П.Еремиин 5 - Библија, Константинов bible

П.Еремиин 5

¹Спомни си Господи што нè најде, погледај, види го нашиот срам!

²Нашето наследство падна во рацете на странците, нашите домови им припаднаа на туѓинците.

³Сирачиња сме: немаме татко, мајките ни се како вдовици.

⁴Водата што ја пиеме ја плаќаме со сребреници, треба да платиме и за дрво.

⁵Јаремот ни е на вратот, нè гонат, исцрпени сме, не нè оставаат да здивнеме.

⁶Ги пружаме рацете кон Египет и Асирија за да се наситиме со леб.

⁷Нашите татковци згрешија, и веќе ги нема, а ние ги носиме казните за нивните беззаконија.

⁸Робови ни заповедаат а никој - да нè избави од нивните раце.

⁹Го донесуваме својот леб излагајќи го животот на меч во пустината.

¹⁰Кожата ни гори како вжарена печка, со треска од пламенот на гладта.

¹¹Ги осквернија жените на Сион и девиците во јудејските градови.

¹²Со свои раце ги бесеа кнезовите, не ги почитуваа ни старечките лица.

¹³Момчињата ги натераа да мелат, децата паѓаа под бремето на дрвата.

¹⁴Старците ја оставија вратата, младите веќе не свират на лири.

¹⁵Ја снема радоста од нашите срца, нашето играње се претвори во тажење.

¹⁶Венецот падна од нашата глава, тешко ни нам што згрешивме!

¹⁷Еве, зошто ни болува срцето, еве, зошто ни се покриваат очите:

¹⁸затоа што опусте Сионската Гора и по неа скитаат шакали.

¹⁹А Ти, Господи, остануваш за секогаш, Твојот престол е од колено до колено.

²⁰Зошто да нè заборавиш за секогаш, да нè оставиш за долго време?

²¹Врати нè кон себе, Господи, и ќе се обратиме. Обнови ги нашите денови како што беа некогаш.

²²Или сакаш да нè зафрлиш сосем и да се срдиш бескрајно на нас?