Read Библија, Константинов Езекиел 24 Bible Online

Езекиел 24 - Библија, Константинов bible

Езекиел 24

¹Во деветтата година, во десетиот месец, во десетиот ден, ми дојде Господово слово:

²”Човечки сине, запиши го овој ден: токму денес вавилонскиот цар го опсадува Ерусалим.

³Раскажи му приказна на одметничкиот дом. Речи им: ‘Господ Бог зборува вака: „Стави котел, стави, и налеј вода во него!

⁴Фрли делови во него; сè најдобри делови месо, бедро и плеќи! Наполни го со најдобри коски!

⁵Земи го најдоброто од стадото. Запали оган под котелот, нека зоврие добро, нека се сварат во него и коските.”

⁶Зашто Господ Бог зборува вака: „Тешко му на крвничкиот град, за’рѓан котел, од кого не се симнува рѓата! А потоа вади од него дел по дел, но не фрлај жрепка за него!

⁷Зашто неговата крв е во него - остави ја на гол камен, не разлевај ја по земјата каде што правот би можел да ја покрие!

⁸За да се распали Мојот гнев, за да му се одмаздам, ја оставив неговата крв на гол камен за да не се покрие.”

⁹Затоа Господ Бог зборува вака: „Горко му на крвничкиот град, зашто ќе запалам голема клада!

¹⁰Собери дрва, потпали оган, свари месо, замешај зачини, нека изгорат и коските!

¹¹А потоа стави го празен врз жарта за да се нажеже котелот и за да се растопи сета негова нечистота, за да се уништи ‘рѓата врз него!

¹²Трудот ќе биде тежок! Но големата ‘рѓа не може да се симне од него: му одолеа и на огнот.

¹³Срамен е твојот грев, ама ни ти не сакаше да се очистиш од гревот; и затоа веќе не ќе се очистиш додека не го излеам врз тебе Својот гнев!

¹⁴Јас, Господ реков! И ќе го исполнам зборот; нема да сменам: И нема да се поштедам, ниту ќе се помилувам! Ќе те судам според твоите патишта и дела - говори Господ Бог.’”

¹⁵И ми дојде Господово слово:

¹⁶”Човечки сине, еве, ќе ти ја одземам со ненадејна смрт желбата на твоите очи! Не тагувај, не плачи и не рони солзи!

¹⁷Липај тивко, но не жали како што се жали за мртвите! И завиткај повез околу главата, а обуј обувки на нозете. Не покривај ја брадата и не јади погачи за жалост.”

¹⁸Така му пророкував на народот, а навечер ми умре жената, та утреден направив како што ми беше заповедано.

¹⁹На тоа народот ме праша: „Не ќе ни кажеш ли што значи за нас тоа што го правиш?”

²⁰Јас им одговорив: „Ми дојде Господово слово:

²¹’Кажи му на Израелевиот дом: „Господ Бог зборува вака: Еве, ќе го предадам на онечистување Моето Светилиште, гордоста на вашата сила радоста на вашите очи и копнежот на вашата душа! И синовите и ќерките што ги оставивте, ќе паднат од меч.

²²Тогаш ќе направите како што направив и Јас: не ќе ги покривате брадите и не ќе јадете погачи за жалост!

²³Ќе завиткате повез околу главата и ќе обуете обувки на нозете! И не ќе тажете веќе и не ќе плачете, туку ќе пропаѓате заради своите гревови и ќе липате еден пред друг!

²⁴А Езекиел ќе ви биде знак, ќе направите сè што направи тој. Кога ќе се збидне тоа, ќе сознаете дека Јас Сум Господ!’”

²⁵А ти, човечки сине, навистина во денот кога ќе им ја одземам силата на нивната славна радост, татковската им радост, сласта на нивната душа, нивните синови и ќерки -

²⁶во тој ден кај тебе ќе стигне бегалец за да ти соопшти тоа!

²⁷Во тој ден ќе се отвори твојата уста, и ти ќе му проговориш на тој бегалец; не ќе бидеш веќе нем. И така ќе им бидеш знак. И тие ќе сознаат дека Јас Сум Господ!’”