Read Библија, Константинов Езекиел 35 Bible Online

Езекиел 35 - Библија, Константинов bible

Езекиел 35

¹И ми дојде Господово слово

²”Човечки сине, сврти го лицето кон Сирската Гора и пророкувај против неа!

³Речи и: ‘Господ Бог зборува вака: „Еве Ме против тебе, Сирска Горо! Ќе ја подигнам раката против тебе и ќе те претворам во запустеност и пустина.

⁴Ќе ги разурнам твоите градови, и ќе станеш пустина. И ќе знаеш дека Јас Сум Господ!

⁵Вечна омраза гоеше и на меч им ги предаваше Израелевите синови кога ќе им се случеше несреќа и кога ќе им чукаше часот на последниот грев.

⁶Затоа, животот Ми Мој - зборува Господ Бог - ќе те предадам на крв и крвта ќе те гони: крвта не ја мразеше, крвта ќе те гони!

⁷Од Сирската Гора ќе направам запустеност и пустина, ќе ги истребам од неа и минувачот и повратникот.

⁸Нејзините гори ќе ги наполнам со трупови: по твоите брежиња, по твоите долини и по твоите котлини ќе паѓаат покосени од меч.

⁹Ќе направам од тебе вечна пустина, твоите градови нема да се населат. И ќе знаете дека Јас Сум Господ!

¹⁰Ти рече: ‘Овие два народа и овие две земји ќе бидат мои; ние ќе ги завладееме, ако и да беше Господ таму!’

¹¹Затоа, животот Ми Мој - говори Господ Бог - ќе постапам со тебе според гневот и ревноста со кои постапи ти во својата омраза кон нив! Ќе Ме запознаеш по тоа како ќе ти судам!

¹²И ќе знаеш дека Јас Господ, ги чув сите твои хули што ги изрече на Израелевите Гори, говорејќи: ‘Запустија, нам ни се дадени за храна!’

¹³Се фалевте против Мене, зборувавте против Мене и ги умножувавте зборовите против Мене; Јас чув!”

¹⁴Господ Бог зборува вака: „За радост на сета земја од тебе ќе направам пустина.

¹⁵Како што ти се радуваше дека запусте Израелевото наследство, така ќе направам со тебе: ќе запустееш Сирска Горо, а со тебе и сиот Едом! И ќе знаат дека Јас Сум Господ!”‘