Read Библија, Константинов Езекиел 4 Bible Online

Езекиел 4 - Библија, Константинов bible

Езекиел 4

¹А ти, човечки сине, земи плитар, постави го пред себе и нацртај го врз него градот Ерусалим.

²Постави опсада околу него, изгради тврдина спрема него, крени насип, ископај околу него окоп, постави ја војската и размести ги ѕидокршачите наоколу.

³Потоа земи железна плоча и постави ја како железен ѕид меѓу себе и градот, та сврти го лицето кон него и ќе биде опсаден. Притисни го! Тоа е знак за домот Израелев!

⁴Потоа легни на својата лева страна и стави го врз себе гревот на домот Израелев: колку денови ќе лежиш така, толку денови ќе го носиш нивниот грев.

⁵Ти давам по ден за година на нивните гревови: триста и деведесет денови ќе го носиш гревот на домот Израелев.

⁶А кога ќе го завршиш тоа, ќе лежиш четириесет денови на десната страна, за да го носиш гревот на Јудиниот дом; ти давам по ден за секоја година.

⁷Тогаш сврти го лицето кон опсадуваниот Ерусалим, протегни ја голата десница и пророкувај против него.

⁸А Јас ќе те врзам со јажиња, за да не можеш да се вртиш од едната страна на другата додека не ги исполниш деновите на својата опсада.

⁹Земи пченица, јачмен, грав, леќа, просо и ‘рж, стави го тоа во еден сад и направи си леб од тоа. Ќе го јадеш онолку денови колку што ќе лежиш на својата страна: триста и деведесет денови.

¹⁰Јадењето што ќе го јадеш ќе биде измерено: дваесет сикли на ден; а ќе го јадеш во одредено време.

¹¹И вода ќе пиеш со мерка шестинка од ин. Ќе ја пиеш во одредено време.

¹²А ќе јадеш погача од јачмен што ќе ја испечеш пред нив врз човечка нечистота.”

¹³И Господ рече: „Така Израелевите синови ќе го јадат својот нечист леб меѓу народите меѓу кои ќе ги протерам.”

¹⁴Јас му одговорив: „О Господи, Боже, ете, мојата душа не е извалкана, зашто уште од детството не вкусив ништо пцовисано ни раскинато, ниту во мојата уста влезе некогаш нечисто месо.”

¹⁵А Тој рече: „Ете, ти давам кравска лепешка место човечка нечистота, за да испечеш леб врз неа!”

¹⁶Уште ми рече: „Човечки сине, ќе ја уништам во Ерусалим последната поткрепа во леб, и ќе јадат леб со мерка и со тешкотија и ќе пијат вода со мерка и со тресење од страв.

¹⁷Нека им снема леб и вода, нека се исушат заради своето беззаконие и нека изгинат еден по друг.