Read Библија, Константинов Езекиел 42 Bible Online

Езекиел 42 - Библија, Константинов bible

Езекиел 42

¹А потоа ме поведе кон север, во надворешниот двор, и ме доведе во просторијата спроти заградениот простор, спроти зданието кон север.

²Нивното чело на северната страна беше долго сто лакти, а широко педесет лакти.

³Спроти дваесетте лакти вратата на внатрешниот двор и спроти плочникот на надворешниот двор беа ходници еден спроти друг на три ката.

⁴Пред просториите беше премин кон внатрешноста, широк десет лакти и долг сто лакти. Вратите им беа свртени кон север.

⁵Горните простории беа помали, зашто ходниците им го одземаа просторот, од долните и од средните.

⁶Зашто беа на три ката, но немаа столбови како во дворот. Затоа горните простории беа потесни од долните и од средните.

⁷Надворешниот ѕид, вдолж на собите кон надворешниот двор, пред собите, беше долг педесет лакти.

⁸Зашто должината на собите на надворешниот двор беше педесет лакти, а на оние пред Храмот сто лакти.

⁹Во тие простории влезот им беше од исток на оној кој им приоѓаше од надворешниот двор.

¹⁰По широчината на ѕидот на дворот кон исток, пред самото здание, имаше уште простории.

¹¹Пред нив имаше премин како пред собите сместени кон север: со иста должина и со иста широчина; и сите нивни излези, распоредот и вратите, им беа еднакви.

¹²Беа како влезовите во собите што беа кон југ: влез на почетокот на секој премин, спроти ѕидот на зданието, кон исток на оној кој влегуваше во нив.

¹³И ми рече: „Северните и јужните простории пред заградениот простор се простории на Светилиштето: таму свештениците кои Му пристапуваат на Господа ќе ги јадат најголемите светини. Тие ќе ги оставаат тука најголемите светини, лебниот принос, жртви за грев и жртви за престапи, зашто тоа место е свето.

¹⁴А кога свештениците ќе влегуваат, нема да излегуваат од Светилиштето во надворешниот двор, туку ќе ја оставаат облеката во која ја служеа службата, зашто е света, и ќе облекуваат друга облека, за да можат да му се приближат на местото одредено за народ.”

¹⁵Откако ја измери внатрешноста на Домот, ме изведе низ источната врата и измери сè наоколу.

¹⁶Со мерачка трска ја измери источната страна: беше пет стотини трски, мерачки трски,

¹⁷а потоа се сврти и ја измери северната страна: беше пет стотини трски, мерачки трски.

¹⁸Тогаш се сврти кон јужната страна и измери: пет стотини трски, мерачки трски.

¹⁹Потоа се сврти кон западната страна и измери: пет стотини трски, мерачки трски.

²⁰Тој го измери ѕидот на сите четири страни наоколу: беше долг пет стотини трски и широк пет стотини. Го одвојуваше светото место од несветото.