Read Библија, Константинов Езекиел 43 Bible Online

Езекиел 43 - Библија, Константинов bible

Езекиел 43

¹Потоа ме поведе кон вратата што гледаше на исток.

²И ете, славата на Израелевиот Бог доаѓаше од исток; шумот и е како шум на големи води: и земјата блескаше од Неговата слава.

³Тоа привидение што го гледав беше како привидот што го видов кога дојдов да го уништам градот и како привидението што го видов покрај реката Хевар, и паднав на лицето.

⁴А Господовата слава влезе во Домот низ вратата што гледаше кон исток.

⁵Тогаш Духот ме подигна и ме одведе во внатрешниот двор. И ете: Домот беше полн со Господовата Слава.

⁶И чув глас што ми зборуваше од Домот, а некој стоеше покрај мене.

⁷И ми рече: „Човечки сине, ова е местото на Мојот Престол ова е место на стапалките на Моите нозе: тука, сред Израелевите синови, ќе престојувам засекогаш. Израелевиот дом нема да го обесветува веќе Моето свето име - ни тие ни нивните цареви - со своето блудствување и со труповите на своите цареви, по нивните високи места.

⁸Го ставија својот праг до Мојот, своите довратници до Моите, така што беше само ѕид меѓу Мене и нив, и го обесветуваа Моето свето име со гнасотиите што ги направија. И затоа ги сотрев во Својот гнев.

⁹Сега тие ќе ги отстранат далеку од Мене своето блудствување и труповите на своите цареви, а Јас ќе престојувам засекогаш сред нив.

¹⁰Човечки сине, покажи му го на Израелевиот дом овој Храм за да се засрамат од своите беззаконија. Нека му ги измерат размерите.

¹¹Ако се засрамат заради сè што направија, опиши им ги Храмот и неговите размери, неговите излези и влезови, сиот негов изглед сите прописи и сите закони; запознај ги и нацртај им, за да видат и да го чуваат и да ги исполнуваат сите негови нацрти и сите прописи за него.

¹²А ова е закон за Домот: горе на врвот, сиот простор наоколу, ќе биде најсвета светина.

¹³Ова се мерките на жртвеникот, со лакти - а лакотот тука, е лакот и една педа: подножјето на жртвеникот лакот долго, лакот широко; работ со кој е обрабен наоколу - една педа. Височината на жртвеникот:

¹⁴од подножјето на земјата до долниот појас на жртвеникот - два лакта, а во широчина еден лакот; од помалиот појас до поголемиот четири лакти, а во широчина еден лакот.

¹⁵А самиот жртвеник висок четири лакти. А од жртвеникот се дигаат нагоре четири рогови.

¹⁶Жртвеникот: долг дванаесет лакти, широк дванаесет лакти, четириаголен, на сите четири страни.

¹⁷А појасот: четиринаесет лакти долг и четиринаесет лакти широк, на четири страни; неговиот раб наоколу половина лакот, а подножјето околу него наоколу еден лакот; басамаците му гледаат кон исток.”

¹⁸И ми рече: „Човечки сине, Господ Бог зборува вака: ‘Ова се жртвените прописи по кои, во свое време, треба да се подигне жртвеникот, за да се принесуваат на него паленици и за да се прска крв по него.

¹⁹На свештениците левити, на Садоковите потомци, кои што пристапуваат кон Мене за да Ми служат - говори Господ Бог - ќе им дадеш јунче за жртва за грев.

²⁰Ќе ја земеш неговата крв и со неа ќе ги намачкаш четирите рогови на жртвеникот и четирите агли за да го очистиш и за да го осветиш.

²¹Потоа земи го јунчето и изгори го на одделеното место на Домот надвор од Светилиштето.

²²Утреден принеси јарец без недостаток како жртва за грев, нека се очисти со него жртвеникот, како што беше очистен со јунчето.

²³А кога ќе го очистиш, принеси јунец без недостаток и овен без недостаток од стадото;

²⁴принеси ги пред Господа, а свештениците нека ги посипат со сол и нека Му ги принесат како паленица на Господа.

²⁵Седум денови, секој ден принеси по еден јарец за грев: и нека бидат принесени јунче и овен од стадото, обата без недостаток.

²⁶Седум денови нека го очистува жртвеникот и нека го очисти и осветува.

²⁷Откако ќе се исполнат тие денови, од осмиот ден натаму свештениците нека ги жртвуваат врз жртвеникот вашите паленици и жртви за грев; и ќе бидам милостив кон вас’ - говори Господ Бог.”