Read Библија, Константинов Осија 12 Bible Online

Осија 12 - Библија, Константинов bible

Осија 12

¹Ефрем се храни со ветер, трча по источниот ветер, цел ден, се повеќе се неговите лаги и насилства. Склучуваат сојуз со Асирија, носат масло во Египет.

²Господ има парница со Израел, ќе го казни Јакова според постапките, ќе му врати според неговите дела.

³Уште во мајчината утроба го истисна братот, во машката сила се бореше со Бога.

⁴Се бореше со Ангел и го надвладеа, плачеше и го молеше. Го најде во Ветил и таму Бог зборуваше со него,

⁵да, Господ, Бог над Воинствата, Господ е Неговото име.

⁶И така, врати Му се ти на својот Бог, чувај ги љубовта и справедливоста и надевај се секогаш во својот Бог!

⁷Во раката на Ханан е крива мерилка, тој сака да задржува.

⁸И Ефрем рече: „Само се збогатив, натрупав благо.” Но од сета печалба ништо не ќе му остане, зашто згреши со беззаконија.

⁹Јас Сум Господ, твој Бог, од Египетската Земја, уште ќе ти дадам да живееш под шатори, како во деновите на Средбата;

¹⁰ќе им зборувам на пророците, ќе ги умножам виденијата и ќе ги учам преку зборовите на пророците.

¹¹Галад е навистина беззаконие, сама суета; во Галгал жртвуваат бикови; затоа жртвениците ќе им бидат како куп камења во полските бразди.

¹²Јаков избега во Арамскиот Крај, Израел служеше за жена, за една жена чуваше стада.

¹³Но преку пророк Господ го изведе Израел од Египет, и преку пророк Тој го чуваше.

¹⁴Ефрем Го навреди прегорчливо: затоа ќе остане врз него, неговиот Господ ќе му ги врати хулите.